سکر: (ن س) سنڌ جي وڏي وزير سيد مراد علي شاهه چيو آهي ته ڪينالن جي مسئلي تي پيپلز پارٽي جي خلاف پروپيگنڊا ڪئي پئي وڃي، اسان ڪينالن جي خلاف سراپا احتجاج آهيون، آئين چوي ٿو ته صوبن جي اتفاق تائين پاڻي جو منصوبو نٿو بڻجي سگهي، هن واضح ڪيو ته ڪوبه منصوبو ٺاهڻ جي سوچ تي ته پابندي نٿي لڳائي سگهجي.سکر ۾ صحافين سان ڳالهيون ڪندي سنڌ جي وڏي وزير سيد مراد علي شاهه چيو ته جولاءِ جا منٽس آيا، پروپگينڊا ڪئي وئي ته صدر آصف علي زرداري منظوري ڏئي ڇڏي، ڪجهه ماڻهو پروپيگنڊا ڪرڻ ۾ تمام گهڻا تيز آهن، صدر آصف زرداري پارليامينٽ ۾ پاڻ چيو ته اهڙن منصوبن جي حمايت نٿو ڪري سگهان. صدر آصف زرداري انهي معاملي تي ڪنهن به سمري تي صحيح نه ڪئي آهي.هن واضح ڪيو ته صدر آصف زرداري ڪنهن به منصوبي جي منظوري نٿو ڏئي سگهي، پاڻي جو معاملو سي سي آءِ ۾ ويندو آهي، صوبن جي مشاورت ٿيندي آهي، اسان هر شيءَ ڏسي ٻڌائي ڇڏيو ته اهو منصوبو غلط آهي، پاڻي جو ڪوبه منصوبو صوبن جي اتفاق کان سواءِ نٿو بڻجي سگهي.هن چيو ته صدر آصف زرداري وٽ ڪنهن کي ڪم کان روڪڻ جو اختيار ناهي، صدر آصف زرداري ڪنهن به سمري تي صحيح نه ڪئي آهي نه ئي وري اپروول ڏني، سنڌ کي ڪنهن به قسم جي تڪليف ٿيڻ نه ڏينداسين.
