اسلام آباد: (بيورو رپورٽ) وفاقي حڪومت آءِ ايم ايف جي هڪ ٻي شرط تي عمل ڪندي فيڊرل بورڊ آف روينيو (ايف بي آر) کان اهم اختيار واپس وٺي ڇڏيا آهن. ناڻي واري وزارت پاران جاري ڪيل نوٽيفڪيشن موجب، وفاقي ڪابينا ناڻي واري وزارت ۾ ٽيڪس پاليسي آفيس قائم ڪيو آهي. ٽيڪس پاليسي سازي ۽ ٽيڪس وصولي کي الڳ ڪيو ويو آهي. هاڻي ايف بي آر صرف ٽيڪس وصولي جي دائري تائين محدود هوندو. نوٽيفڪيشن ۾ چيو ويو آهي ته ايف بي آر آمدني وڌائڻ لاءِ ٽيڪس تجويزن تي عمل درآمد تي ڌيان ڏيندو، ٽيڪس پاليسي آفيس سڌو سنئون ناڻي ۽ روينيو جي وزير کي رپورٽ ڪندو، ٽيڪس پاليسي آفيس حڪومت جي سڌاري جي ايجنڊا کي ترتيب ڏيڻ تي ڪم ڪندو، ۽ ٽيڪس پاليسي آفيس ٽيڪس پاليسين ۽ تجويزن جو تجزيو ڪندو.
