ڪراچي (ويب ڊيسڪ) آسٽريليا جي ڪپتان ايرون فنچ ۽ ڊيوڊ وارنر جي شاندار سينچرين جي بدولت ڀارت کي پهرين ون ڊي ميچ ۾ آئوٽ ڪلاس ڪندي 10 وڪيٽن کان شڪست ڏئي سيريز ۾ 0-1 جي برتري حاصل ڪري ورتي آهي. ممبئي ۾ کيڏيل ٽن ميچن جي سيريز جي پهرين ميچ ۾ آسٽريليا ٽاس کٽي پهرين بالنگ ڪرڻ جو فيصلو ڪيو جيڪو صحيح ثابت ٿيو 13 جي مجموعي اسڪور تي اوپنر آئوٽ ٿيو ۽ 164 رنسن تي اڌ ٽيم آئوٽ ٿي وئي. جنهن کان پوءِ ڀارتي ٽيم آخري اوور ۾ 255 رنسن تي ڍير ٿي وئي. جواب ۾ ڊيوڊ وارنر ۽ فنچ جارحاڻو انداز ۾ کيڏندي پنهنجي ٽيم کي بهتري آغاز فراهم ڪيو ۽ ڀارتي بالرن کي دل سان ڪٽڪو ڏنو. ٻئي رانديگر ڪنهن به قسم جي چانس ڏيڻ بغير پنهنجون پنهنجون سينچريون مڪمل ڪري ڀارتي شوقينن تي سڪتو طاري ڪري ڇڏيو. مين آف دي ميچ وارنر 112 بالن تي 3 ڇڪن ۽ 17 چوڪن جي مدد سان 128 جڏهن ته فنچ 2 ڇڪن ۽ 13 چوڪن جي مدد سان 110 رنسون ٺاهيون. جڏهن ته سيريز جي ٻي ميچ 17 جنوري تي راجڪوٽ ۾ کيڏي ويندي.
