نوشهروفيروز(ڊ ر) ڳوٺ الهبچايو چانڊيو جي رهواسيءَ پاران ابڙان پوليس جي مبينه زيادتين خلاف پريس ڪلب آڏو احتجاجي مظاهرو ڪيو ويو. ان موقعي تي ڳوٺاڻي عبدالجبار چانڊيي ٻڌايو ته ابڙان پوليس ڪجهه وقت اڳ قتل ٿيل نينگر ڪامران چانڊيي واري ڪيس ۾ بيگناهه سندن خلاف رڻ ٻاري ڏنو آهي جڏهن ته ڪيس جو مک جوابدار به ظاهر ٿي چڪو آهي ۽ ان ڏوهه جو به اعتراف ڪيو آهي. ان کان اڳ پوليس ڳوٺ مان 8 ڄڻن کي حراست ۾ وٺي سمورن جي ڊي اين اي ڪرائي ته ڪنهن جي به ڊي اين اي ثابت نه ٿي جنهن ڪري پوليس 7 ڄڻن کي آزاد ڪري سندس ڀاءُ مختيار چانڊيو کي غائب ڪري ڇڏيو ۽ سندس آزادي لاءِ رشوت جي گهر ڪئي نه ڏيڻ تي قتل ڪيس ۾ ڦاسائڻ جي ڌمڪي ڏني جنهن ڪري هنن مجبور ٿي ايس ايڇ او رفيق ٻوهيو کي هڪ لک روپيا ڏئي پنهنجي ڀاءُ کي آزاد ڪرايو جڏهن ته ان کان هن پنهنجي ڀاءُ جي آزادي لاءِ نوشهروفيروز جي عدالت ۾ 491 تحت درخواست داخل ڪرائي ۽ جج کي پوليس ناجائزين جا ثبوت پڻ فراهم ڪيا جنهن تي عدالت پوليس خلاف ڪيس داخل ڪرڻ جو حڪم ڏنو ۽ عدالت ۾ تحفظ جي درخواست تي عدالت پوليس کي تنگ نه ڪرڻ جي به هدايت ڪئي پر هاڻي پوليس سندن خلاف عذاب بڻجي وئي آهي ۽ کين ڪوڙن ڪيسن ۾ ڦاسائڻ جون ڌمڪيون ڏنيون پيون وڃن. جڏهن ته پوليس جي چوڻ تي سندن زميندار به زمين مان بي دخل ڪري ڇڏيو آهي ۽ سندس ڪاهيل ڏيڍ ايڪڙ ڪڻڪ جي فصل تي به قبضو ڪري ڪڻڪ کڻي ويو آهي پر ڪير به سندن داد فرياد ٻڌڻ وارو ناهي. هن چيو ته کيس پوليس جي ظلم کان بچائي تحفظ فراهم ڪيو وڃي.
تازيون خبرون
مشهور خبرون
