ڪراچي(اسٽاف رپورٽر)پ پ چيئرمين بلاول ڀٽو زرداري پاڪستان جو خواب ڏسندڙ شاعر مشرق علامه اقبال کي سندس 147 هين سالگرهه تي ڀيٽا پيش ڪئي آهي. جاري ڪيل بيان ۾ بلاول ڀٽو زرداري چيو ته علامه اقبال جي فڪري ۽ نظرياتي رهنمائي ننڍي کنڊ جي مسلمانن کي شعور ۽ بيداري ڏني، شاعر مشرق جي سوچ اڄ به سندن ملڪ لاءِ مشعل راهه آهي. سندس چوڻ هو ته علامه اقبال هڪ اهڙي معاشري جو خواب ڏٺو هو جتي انصاف، برابري ۽ اتحاد بنيادي قدر هجن. پ پ چيئرمين بلاول ڀٽو زرداري چيو ته پاڪستان جو عوام خاص طور نوجوان اقبال جي شاعري ۽ فلسفي مان سبق حاصل ڪن، قوم اقبال جي ميراث کي رڳو لفظن ۾ نه پر عمل ذريعي زنده رکي. هن چيو ته قوم هڪ اهڙي معاشري کي هٿي وٺرائي جنهن جو بنياد رواداري، ديانتداري ۽ ترقي تي هو. پ پ چيئرمين بلاول ڀٽو زرداري چيو ته اچو هو اقبال جي خواب کي پنهنجي ذاتي ۽ اجتماعي زندگي ۾ شامل ڪري اڳتي وڌن، اهڙو پاڪستان ٺاهيون جو اقبال جو تصور ڪيل انصاف، امن ۽ برابري جي اصولن کي ظاهر ڪندو هجي.
