واشنگٽن (ڊيسڪ نيوز) آمريڪا جي صدر ڊونلڊ ٽرمپ چيو آهي ته پاڪستان ۽ ڀارت جي وزيراعظمن سان ستت ئي ملاقاتون ڪندس. ميڊيا رپورٽن مطابق ڊونلڊ ٽرمپ طرفان پاڪستاني وزيراعظم عمران خان سان ملاقات جي حوالي کان وقت ۽ هنڌ جا تفصيل ظاهر ناهن ڪيا ويا. پر آمريڪي صدر طرفان اميد ظاهر ڪئي وئي آهي ته پاڪستان ۽ ڀارت ۾ ڇڪتاڻ گهٽائڻ لاءِ ڪوششون ڪيون پيون وڃن. آمريڪي صدر جو چوڻ آهي ته ٻنهي ملڪن جي ڇڪتاڻ گھٽائڻ جي حوالي سان سٺي اڳڀرائي ٿي چڪي آهي. جڏهن ته وڌيڪ ڪوششون ڪيون پيون وڃن. امڪان ظاهر ڪيو پيو وڃي ته ڊونلڊ ٽرمپ پاڪستاني وزيراعظم سان هن مهيني نيويارڪ ۾ ٿيندڙ گڏيل قومن جي جنرل اسيمبلي اجلاس واري موقعي تي سائيڊ لائين نوعيت واري ملاقات ڪندو. ٻئي طرف واشنگٽن مان هڪ ڀارتي صحافڻ خبر ڏني آهي ته ڀارتي وزيراعظم نريندر مودي 22 سيپٽيمبر واري ڏهاڙي آمريڪي رياست هيوسٽن جي هڪ راند واري ميدان ۾ ڀارتي عوام جي ميڙ کي خطاب ڪندو. امڪان اهي آهن ته آمريڪي صدر به انهيءَ عوامي جلسي ۾ خاص شرڪت ڪري مختصر خطاب ڪندو. مبصرن جو چوڻ آهي ته اهو تاريخ ۾ پهريون ڀيرو هوندو جو ڪوئي آمريڪي صدر ڪنهن ٻئي ملڪ جي حڪمران لاءِ ٿيل ميڙ ۾ شريڪ ٿي خطاب ڪندو. جڏهن ته وچ اوڀر ۾ هلندڙ ڇڪتاڻ وارن معاملن بابت تازو بيان جاري ڪندي آمريڪي صدر چيو آهي ته اها ڳالهه يقيني نظر اچي ٿي ته سعودي عرب جي تيل وارن ٺڪاڻن تي حملن پٺيان ايران جو هٿ آهي ان هوندي به آمريڪا ڪوئي تڪڙو قدم کڻڻ کان پهريان وڌيڪ ثبوتن جو طلبگار آهي. انهيءَ بيان ۾ ئي آمريڪي صدر وچ اوڀر ۾ جنگ ٿيڻ جي امڪانن جي ترديد ڪئي آهي.
