اسلام آباد (رپورٽ اياز مهر) وزير اعظم شهباز شريف انساني اسمگلنگ ۾ ملوث جوابدارن خلاف سستي ڏيکاريندڙ آفيسرن خلاف ڪاروائي جو حڪم ڏنو آهي. اهڙو حڪم هن خصوصي طور سڏايل اجلاس کي خطاب دوران ڏنو. هن تازو يونان ۾ ٻيڙي ٻڏڻ سبب 40 پاڪستانين جي فوت ٿيڻ جو ذڪر ڪندي چيو ته ڪجهه سالن کان اهڙا واقعا نموداري ٿي رهيا آهن جيڪي عالمي سطح تي ملڪ جي بدنامي جو سبب بڻجن ٿا. هن چيو ته انساني اسمگلنگ ۾ ملوث ماڻهو ڪنهن رعايت جا مستحق نه آهن، انه خلاف ڀرپور ڪاروائي ڪئي وڃي. هن وڌيڪ چيو ته ايف آءِ اي جا جيڪي آفيسر ذميوار آهن انهن خلاف ڪاروائي ڪئي وڃي. ياد رهي ته جون 2023 ۾ به هڪ ٻيڙي يونان م ٻڏي وئي هئي جنهن ۾ 209 پاڪستاني شامل هئا. گذريل سال اپريل ۾ مغربي لبيا جي سمنڊ ۾ هڪ ٻيڙي ٻڏي هئي جڏهن ته ساڳئي سال فيبروري ۾ اٽلي لڳ سمنڊ ۾ ٻيڙي ٻڏي هئي جنهن ۾ 59 پاڪستاني سوار هئا. ايف آءِ اي وارن تازي يونان واري واقعي بعد جاري ڪيل بيان ۾ چيو هو ته ٻن ايف آءِ اي آفيسرن ۽ ٽن اسمگلرن خلاف ڪيس داخل ڪيو ويو آهي. وزيراعظم چيو ته لڳاتار اهڙا واقعا ٿين ٿا پر پاڪستاني اختياريون ڪاروائي ۾ سستي ڪن ٿيون، جوابدارن خلاف سخت ڪاروائي ٿئي جيئن ڪو جرئت نه ڪري سگهي. وزيراعظم هدايت ڪئي ته واسطيدار کاتن جو پاڻ ۾ تعاون وڌايو وڃي، معلومات شيئر ڪئي وڃي ۽ ڪاروائي لاءِ موثر حڪمت عملي جوڙي وڃي. وزيراعظم هدايت ڪئي ته ڪيسن جي پيروي تيز ڪئي وڃي ۽ جوابدارن کي سزا ڏياري وڃي. وزيراعظم کي ٻڌايو ويو ته تازي واقعي ۾ گجرانولا، گرات، سيالڪوٽ ۽ منڊي بهاوالدين جا ماڻهو متاثرين ۾ شامل آهن.
