تهران(ويب ديسڪ) ايران جي صدر حسن روحاني جي ڀاءُ حسين فريدون کي مبينه ڪرپشن جي ڪيس ۾ عدالت 5 سال سزا ٻڌائيندي جيل اماڻي ڇڏيو آهي. ايران جي خابرو اداري فارس موجب عدالتي ترجمان موجب مٿس رشوت ۽ مني لانڊرنگ جا ٻيا الزام به آهن جن بابت سزا بعد ۾ ملي سگهي ٿي. کيس 2017 ۾ گرفتار ڪيو ويو هو ۽ هڪ ڏينهن جيل ۾ رکڻ بعد سندس ضمانت تي آزاد ڪيو ويو هو. ان وقت ايراني ميڊيا ۾ خبرون آيون هيون ته هن هڪ ڪروڙ 53 لک ڊالر ادا ڪيا هئا پر ان جي ڪا به تصديق نه ٿي سگهي هئي. برطانوي خابرو اداري رائٽرز به کيس مليل سزا ۽ جيل اماڻڻ جي تصديق ڪئي آهي. ايران جي عدالتي ترجمان غلام حسين اسماعيلي به سزا جي تصديق ڪئي آهي. حسين فريدون ملائيشيا ۾ 8 سال سفير رهيو ۽ صدر جو خاص معاون به رهي چڪو آهي.
