ڪراچي (خاص رپورٽ) سنڌ نيوز پيپرز سوسائٽي جي صدر دفتر ۾ انڊومنٽ فنڊ پروگرام جي سلسلي جي ٻئي تقريب ۽ افطار دعوت جو اهتمام ڪيو ويو۔ ميمبر اخبارن سان لاڳاپيل مشڪلاتن جو شڪار ماڻهن ۾ امدادي چيڪ ورهايا ويا۔ تقريب ۾ خاص مهمان طور تي سنڌ جي اطلاعات کاتي جي ڊائريڪٽر جنرل تعلقات عامه، محترم جناب معيز پيرزادو شرڪت ڪئي۔ انهن سان گڏ ڊائريڪٽر ايڊمن منصور احمد راجپوت، ڊائريڪٽر پريس حزب الله ميمڻ، ايس او محمد نذير احمد ۽ سپرنٽينڊنٽ عمار احمد پڻ شامل هئا۔ معزز مهمانن پنهنجي خيالن جو اظهار ڪندي سنڌ نيوز پيپرز سوسائٽي (SNS) جي ان قدمن کي ساراهيندي چيو ته تمام محدود وسيلن جي باوجود سوسائٽي هڪ بهترين مثال قائم ڪيو آهي ۽ پنهنجن لاڳاپيل ماڻهن کي وساريو ناهي۔ صدر سنڌ نيوز پيپرز سوسائٽي معزز مهمانن کي ڀليڪار ڪيو ۽ کين ثقافتي سنڌي ٽوپي جو تحفو پيش ڪيو، جڏهن ته سيڪريٽري جنرل رضوان شاهه اجرڪ ۽ ايگزيڪيوٽو ڪميٽي جي ميمبر مختيار احمد سومري گلن جا گلدستا پيش ڪيا۔ تقريب جي شروعات تلاوت ڪلام پاڪ سان ٿي، جنهن کان پوءِ ديدار سنديلو مهمانن کي انڊومنٽ فنڊ پروگرام جي مقصدن بابت آگاهه ڪيو ۽ عزم جو اظهار ڪندي چيو ته اسان جي ڪوشش آهي ته فنڊز جي دستيابي سان هن ڪم کي وڌيڪ وڌايو وڃي۔ هن نشاندهي ڪئي ته اخبارون شديد مشڪلاتن کي منهن ڏئي رهيون آهن، ڇو ته اشتهار ئي اخبار جو بنيادي معاشي سهارو هوندو آهي۔ هن چيو ته اشتهارن جي ورڇ ۾ نه رڳو سنڌ پر وفاق به ميمبر اخبارن کي نظرانداز ڪري رهيو آهي، جنهن سبب اخبار سان لاڳاپيل ماڻهو سخت متاثر ٿي رهيا آهن۔ هن معزز مهمانن کان ميمبر اخبارن جي مسئلن جي حل لاءِ مدد جي درخواست پڻ ڪئي۔ ان کان پوءِ خاص مهمان ڊائريڪٽر جنرل تعلقات عامه، اطلاعات کاتو سنڌ معيز پيرزادو، ڊائريڪٽر ايڊمن منصور احمد راجپوت، ۽ ڊائريڪٽر پريس حزب الله ميمڻ امدادي رقم جا چيڪ ورهايا۔ تقريب ۾ ايگزيڪيوٽو ڪميٽي ۽ گورننگ باڊي جا ميمبر شاهد انصاري، عامر راٺور، سيد اقبال حسين ۽ ٻيا ميمبر به شريڪ ٿيا۔
