اسلام آباد (بيورو رپورٽ)پيپلز پارٽي جي نائب صدر شيري رحمان تحريڪ انصاف جي احتجاج تي رد عمل ڏيندي چيو آهي ته پي ٽي آءِ جا باني اڄ به ادارن کان ڳالهين جو مطالبو ڪري رهيا آهن، اها درخواست ڳالهين جي نه پر ڊيل جي آهي.هڪ بيان ۾ شيري رحمان چيو ته هاڻي عالمي اخبارون به لکي رهيون آهن ته باني پي ٽي آءِ ادارن سان ڊيل چاهين ٿا.هن چيو ته پي ٽي آءِ جو احتجاج پرامن آهي ته پوءِ اسلام آباد انتظاميا کان اجازت ڇو نه ورتي وئي؟ شيري رحمان جو چوڻ آهي ته قانون لاڳو ڪندڙ ادارا انهن سان ڊيل ڪرڻ لاءِ حڪمت عملي جوڙي پئي وڃي.اهو ڪنهن به لحاظ کان پرامن سياسي احتجاج ۽ جلسو ڪرڻ جو ارادو نٿو رکي. پيپلز پارٽي جي اڳواڻ وڌيڪ چيو ته ڪي پي ڪي ۾ تحريڪ انصاف جي حڪومت هڪ ڀيرو ٻيهر اسلام آباد تي حملي جي تيارين ۾ مصروف آهي، خيبرپختونخواهه ۾ امن امان جي صورتحال انتهائي ڳڻتي جوڳي آهي.هن جو اهو به چوڻ آهي ته تحريڪ انصاف جي صوبائي حڪومت صوبي ۾ امن ۽ ترقي بدران انتشار پکيڙڻ جون ڪوششون ڪري رهي آهي.
