اسلام آباد(بيورو رپورٽ) ايشيائي ترقياتي بئنڪ بجلي جي ورڇ واري نظام کي جديد بڻائڻ لاءِ پاڪستان کي 20 ملين ڊالر قرض ڏيڻ جي منظوري ڏئي ڇڏي آهي.ايشيائي ترقياتي بئنڪ جي اعلان موجب پاڪستان کي 200 ملين ڊالر جو قرض ڏنو ويندو ته جيئن ڊسڪوز کي قابل اعتماد بجلي جي فراهمي يقيني بڻائي سگهجي.اي ڊي بي موجب رقم ليسڪو، ميپڪو ۽ سيپڪو جي انفراسٽرڪچر جي بهتري لاءِ استعمال ڪئي ويندي. گرڊ مان قابل اعتماد بجلي جي فراهمي ڪاروبار کي تمام گهڻي سهولت فراهم ڪندي جڏهن ته پاور ٽرانسميشن نقصان کي گهٽائڻ ۽ انفراسٽرڪچر کي بهتر بڻائيندو.بيان ۾ چيو ويو آهي ته ايشيائي ترقياتي بئنڪ پاڪستان جي وڌندڙ بجلي جي ضرورتن کي پورو ڪرڻ لاءِ مدد فراهم ڪندو. امداد بجلي جي ورڇ واري نظام کي جديد بڻائيندي ۽ نقصانات ۾ گهٽتائي آڻيندي، جڏهن ته بجلي جي نقصانن ۾ گهٽتائي سان شعبي جي مجموعي نقصان ۾ نمايان طور تي گهٽتائي ايندي.ايشيائي ترقياتي بئنڪ موجب منصوبي تحت 332,000 ايڊوانس ميٽرز لڳايا ويندا، جيڪي ڊسڪوز کي حقيقي وقت ۾ بجلي جي استعمال ۽ گرڊ جي ڪارڪردگيءَ جو ڊيٽا فراهم ڪندا، جڏهن ته پروجيڪٽ ٽن ڊِسڪوز جي آن لائين ٽرانسفارمر مانيٽرنگ کي فعال بڻائيندو.بيان ۾ چيو ويو آهي ته قرض سيپڪو جي 66 ڪلو واٽ جي چئن گرڊ اسٽيشنن کي 132 ڪلو واٽ تائين اپ گريڊ ڪرڻ، ليسڪام جي 25 گرڊ اسٽيشنن کي جديد ڪرڻ، ڊسٽري بيوشن سسٽم کي اپ گريڊ ڪرڻ لاءِ استعمال ڪيو ويندو ته جيئن خسارو گهٽائڻ ۽ بلن جي وصولي کي وڌايو وڃي.
