لنڊن (ڊيسڪ نيوز) پاڪستان ڄائي برطانوي شهري ۽ بيسٽ وي گروپ جي باني سر انور پرويز چيو آهي ته اڳوڻو چيف جسٽس ثاقب نثار هاڻي به منهنجي ڊيڄاريندڙ خوابن ۾ ايندو آهي. هن الزام هڻندي چيو ته ثاقب نثار سوموٽو نوٽيس وٺي پاڪستان ۾ منهنجي ڪاروبار کي نقصان پهچايو. ”جيو نيوز“ ويب سائيٽ خبر ڏيندي چيو آهي ته هڪ انٽرويوءَ ۾ سر انور پرويز چيو ته اڳوڻي چيف جسٽس منهنجي سيمينٽ فيڪٽريءَ ۽ بينڪ کي نشانو بڻايو. ثاقب نثار منهنجي ڪاروباري ادارن کي غيرمنصفاڻي انداز سان نشانو بڻايو. سر انور پرويز اها ڳالهه اڳوڻي چيف جسٽس پاران ڏنل سخت رمارڪس کانپوءِ ڪيترن مهينن تائين هلندڙ منفي ڪوريج جي حوالي کان چئي. انور پرويز چيو ته سچ اهو آهي ته ثاقب نثار ۽ پاڪستاني ميڊيا منهنجي لاءِ ڊيڄاريندڙ خواب آهن. پنجاب صوبي جي ڪٽاس راج مندر بابت هڪ ڪيس ۾ ثاقب نثار چيو هو ته اتان جون سيمينٽ فيڪٽريون ايڪو سسٽم تباهه ڪري رهيون آهن ۽ خاص طور تي بيسٽ وي جي سيمينٽ فيڪٽريءَ تي تنقيد ڪئي وئي. جڏهن ته اڳوڻي چيف جسٽس جي دور ۾ يو بي ايل بينڪ کي به ڪيسن ۾ گهليو ويو جنهن جا اڪثر شيئر بيسٽ وي گروپ وٽ خريد ٿيل آهن. انور پرويز چيو ته ”پوءِ مون پاڪستان جي هڪ بااثر شخصيت سان ملاقات ڪئي ته جيئن کيس چيف جسٽس پاران بيسٽ وي گروپ کي نامناسب انداز سان نشانو بنائڻ جي دانهن ڏئي سگهجي. انور پرويز چيو ته پاڪستان ۾ اگر ڪنهن کي پيٽ ۾ سور به هجي ته هڪ ئي ڊاڪٽر آهي جيڪو ان جو علاج ڪري سگهي ٿو. مان به ان وٽ ئي ويس پر منهنجي ان ملاقات جو ڪو سٺو نتيجو نه نڪتو. منهنجو ڪيس اڃان به عدالت ۾ پيل آهي. هڪ سوال جي جواب ۾ انور پرويز چيو ته پاڪستان ۾ سوموٽو حتياط سان وٺڻ گھرجن ۽ وزيراعظم عمران خان کي گهرجي ته ادارن کي مضبوط ڪرڻ تي ڌيان ڏئي . اهو به ٻڌايو ويو آهي ته ڊيم فنڊ خاطر 2018 دوران لنڊن ۾ ٿيل هڪ تقريب کي خطاب ڪندي اڳوڻي چيف جسٽس ثاقب نثار بيسٽ وي گروپ جي مالڪن انور پرويز ۽ ضمير چوڌريءَ جي ڪم جي تعريف ڪئي. جڏهن ته ضمير چوڌريءَ ڊيم فنڊ لاءِ 06 لک پائونڊ عطيو ڏيڻ جو اعلان ڪيو هو. جنهن بعد ثاقب نثار کلئي عام چيو هو ته ”مان بيسٽ وي گروپ سان معذرت ڪيان ٿو جيڪو بدقسمتيءَ سان منهنجي عدالتي ايڪٽوازم جو شڪار ٿيو“.
