لاڙڪاڻو(بيورو رپورٽ) لاڙڪاڻي ۾ پاڪستان پيپلز پارٽي شهيد ڀٽو طرفان پي پي پي جي باني قائد ۽ ملڪ جي اڳوڻي وزيراعظم شهيد ذوالفقار علي ڀٽو جي 46 هين ورسي جي موقعي تي سنڌ جي هندو برادري سان اظهار يڪجهتي طور ۽ ڪئنالن خلاف شهر جي مک جناح باغ چوڪ تي ڪوٺايل جلسي کي خطاب ڪندي پ پ پ ش ڀ جي چيئرمين شهيد مير مرتضيٰ ڀٽو جي فرزند جونيئر ذوالفقار علي ڀٽو خطاب ڪندي چيو ته اڄ مان هندو برادري سان واسطو رکندڙ سنتوش ڪمار ۽ سنجي ڪمار جي شهر لاڙڪاڻي ۾ موجود آهيان، جڏهن آئون پنهنجي شهيد بابا مير مرتضيٰ ڀٽو سان گڏجي شهيدن جي سرزمين ڳڙهي خدا بخش ڀٽو ۾ شهيد ڏاڏي ذوالفقار علي ڀٽو ۽ ٻين جي شهيدن جي مزارن تي ايندو هيس ته اهي مزارون فقيرن جون مزارون لڳنديون هيون، پر اڄ زرداري جي حڪومت شهيد ذوالفقار علي ڀٽو جي مزار تي محل تعمير ڪرايو آهي، جڏهن ته شهيد ذوالفقار علي ڀٽو ڪو بادشاھ يا شهنشاھ نه هو، پر هو عوام جو خادم هيو. هن چيو ته وڏي افسوس جي ڳالھ آهي جو اڄ سنڌ سان واسطو رکندڙ هندو برادري صوبي مان لڏپلاڻ ڪري رهي آهي، ڇاڪاڻ جو انهن سان مسلسل ظلم ۽ زيادتي ٿي رهي آهي. هن وڌيڪ چيو ته شهيد ذوالفقار علي ڀٽو هن ملڪ کي آئين ڏنو، پر اڄ حڪمرانن سنڌ کي ڪربلا بڻائيندي صوبي جي عوام کي پاڻي ڍڪ کان پريشان ڪيو آهي، جڏهن ته درياھ سنڌ اسان جو آهي، ان تي سنڌين جو حق آهي. جونيئر ذوالفقار علي ڀٽو وڌيڪ چيو ته سکر جي سنگرار شهر ۾ محرم الحرام جي مهيني دوران امام حسين عليه السلام جي سبيل تقسيم ڪندڙ معصوم نياڻي پريا ڪماري کي اغوا ڪيو ويو آهي، جنهن جو هن وقت تائين ڪو ڏس پتو ناهي، جڏهن ته جنهن وقت منهنجو والد شهيد مير مرتضيٰ ڀٽو جلا وطن هيو ته ان وقت هڪ بوتل ۾ سنڌو درياھ جو پاڻي ته ٻي بوتل ۾ واري موجود هوندي هيس. هن چيو ته سنڌو درياھ سنڌ جي ريڙھ جي هڏي آهي، جڏهن ته تڪراري ڪئنالن خلاف سنڌ جون قومپرست جماعتون گڏ آهن، جنهن لاءِ سنڌو درياھ ۽ ان ۾ موجود ٻلهڻ کي جيئڻ ڏنو وڃي. ان موقعي تي جي ڊي اي جي مرڪزي جنرل سيڪريٽري ڊاڪٽر صفدر علي عباسي، جماعت اسلامي پاڪستان سنڌ جو امير ڪاشف سعيد شيخ، سنڌ هاءِ ڪورٽ بار ايسوسيئشن لاڙڪاڻي جو صدر اطهر عباس سولنگي، جي يو آءِ اڳواڻ محبت علي کهڙو ۽ ٻين پڻ جلسي کي خطاب ڪيو.
