ماسڪو(ويب ڊيسڪ) باڪسنگ ڪيريئر ۾ ناقابل شڪست رهندڙ روسي باڪسر آمريڪا ۾ ‘يو ايس ايف 254 ’ ٽائٽل کٽڻ بعد ريٽائرمينٽ جو اعلان ڪري ڇڏيو آهي. خبيب نورما گيدووف لائٽ ويٽ چيمپئن گيدووف آمريڪي باڪسر جسٽن گائيٿي کي ٻئي رائونڊ ۾ چت ڪري ڇڏيو. جسٽن ٽيون ڀيرو لڳاتار يو ايس ايف ٽائٽل کٽڻ لاءِ ميدان ۾ لٿو ته روسي باڪس کيس مُڪن سان ٻوٿ سڄائي ڇڏيو. گيدووف جو والد عبدالمناف گيدووف جيڪو سندس ڪوچ به هو تازو ڪورونا سبب فوت ٿي ويو هو. جنهن بعد سند پٽ جو هي پهريون عالمي مقابلو هو. هن ڪيريئر ۾ 29 مقابلا کٽي ناقابل شڪست رهيو. هن جو چوڻ آهي ته منهنجو بابا ۽ منهنجو ڪوچ دنيا ۾ ناهي رهيو ته مان ڪيئن وڙهندس. هن چيو ته مون امڙ کي به آگاهه ڪري ڇڏيو هو ته مان ريٽائر ٿي رهيو آهيان. 2018 ۾ هن آمريڪا ۾ هڪ مقابلي ۾ آئرش باڪسر ڪونر مِڪ گريگر کي جڏهن شڪست ڏئي ٽائٽل کٽيو هو ته هارايل باڪسر جي ٽيم پاران سندس خلاف هوٽنگ ڪئي وئي هئي، جنهن تي هن باڪسنگ رِنگ مان ٽپو ڏئي مٿن ٺونشا وساي هئا، جنهن تي ٽورنامنٽ جي انتظاميا کيس بيلٽ ڏيڻ کان انڪار ڪيو هو. جنهن تي هن ٻئي ڏينهن پريس ڪانفرسن ڪري معذرت ڪئي هئي ته مان اهڙي مزاج جو ماڻهو ناهيان، پر مخالفن منهنجي مذهب، والد ۽ ملڪ جي خلاف جملي بازي ڪئي ته ڪاوڙ اچي وئي هئي. جنهن بعد کيس ٽائٽل ڏنو ويو هو.
