تونسا(ويب ڊيسڪ) وزيراعظم شهباز شريف چيو آهي ته سعودي عرب هميشه پاڪستان جي مالي، اقتصادي ۽ ڊپلوميٽڪ مدد ڪئي، بدلي ۾ سعودي حڪومت ڪڏهن ڪجهه ناهي گهريو، ڪالهه سعودي عرب خلاف جيڪو بيان ڏنو ويو، ان کان وڏي ملڪ دشمني نٿي ٿي سگهي. تونسا ۾ ڪڇي ڪينال جي بحالي واري تقريب کي خطاب ڪندي هن چيو ته جنرل (ر) مشرف جي دور ۾ ان رٿا جو ٻيڙو ٻوڙيو ويو، بنا ڪنهن ٽينڊر جي ٺيڪيدارن جي حوالي ڪيو ويو، سڀ شاهدن آهن ته ڪهڙي بيدرديءَ سان قوم جو پئسو ضائع ڪيو ويو جڏهن ٻيهر نون ليگ جي حڪومت آئي ته 2018ع ۾اِهو ڪينال مڪمل ڪيو ويو. شهباز شريف چيو ته سعودي پاڪستان جو اهڙو برادر ملڪ آهي جنهن جي جيتري تعريف ڪجي گهٽ آهي، سعودي سدائين پاڪستان جي مالي، اقتصادي ۽ ڊپلوميٽڪ مدد ڪئي، ان بدلي ۾ سعودي حڪومت ڪڏهن ڪجهه ناهي گهريو، ڪالهه جيڪو بيان سامهون آيو ان کان وڏي ملڪ دشمني ٻي نٿي ٿي سگهي. وزيراعطم جو چوڻ هوته سعودي بادشاهه ۽ ولي عهد پاڪستان جي مدد ڪري رهيا آهن، هنن چيو آهي ته اوهان منصوبا آڻيون اسان ته انتظار ۾ آهيون، انهن خلاف زهر اوڳاڇڻ ڪيئن هوندو؟هن چيو ته جڏهن پاڪستان ايٽمي طاقت بڻيو ته هو ۽ نواز شريف سان سعودي ۾ هئا، مرحوم ڪنگ عبدالله نواز شريف جو هٿ پڪڙيو ۽ چيو ته تون منهنجو ڀاءُ آهين، اِهو فرمانروا جو حال آهي. وزيراعظم چيو ته پاڪستان کي آءِ ايم ايف وٽان بيل آئوٽ پئڪيج ڏيارڻ ۾ سعودي عرب ڪردار ادا ڪيو، سعودي عرب خلاف زهر اوڳاڇڻ ڏوهه آهي. هن وڌيڪ چيو ته قوم سعودي عرب خلاف پروپيگنڊا ۽ ملڪي سلامتي سان کيڏڻ وارن جا هٿ ڀڃي ڇڏيندي.
