ڪراچي (اسٽاف رپورٽر): سنڌ جي نگران وڏي وزير جسٽس (ر) مقبول باقر چيو آهي ته سنڌ مرچن جي ٽوٽل قومي پيداوار ۾ 80 سيڪڙو حصو وجهندي آهي جيڪا 144000 ميٽرڪ ٽن بڻجي ٿي. هن اها ڳالهه پاڪ چين اقتصادي راهداري زرعي منصوبي تحت پاڪستان مان چين کي برآمد ٿيندڙ خشڪ مرچن جي پهرين کيپ جي تقريب کي خطاب ڪندي چئي. ان پروگرام ۾ چين جي قونصل جنرل يانگ، مسٽر يونڊونگ، پراجيڪٽ مئنيجر سيچوان ليٽونگ فوڊ ڪمپني لميٽيڊ جي مسٽر زينگ شرڪت ڪئي جڏهن ته فوڊ سيڪيورٽي اينڊ ريسرچ واري وفاقي وزير ڪوثر عبدالله ملڪ ۽ چيني سفير جيان زيڊونگ جا رڪارڊ ڪيل پيغام اجلاس جي اسڪرين تي ڏيکاريا ويا. وڏي وزير چيو ته زراعت کاتي جي ريسرچ انسٽيٽيوٽ، ڪنري ٻه نوان قسم (ڪنري-1 ۽ نگينه) تيار ڪيا آهن جيڪي مقامي قسمن جي ڀيٽ ۾ 25 کان 30 سيڪڙو وڌيڪ پيداوار ڏين ٿيون. هن وڌيڪ چيو ته ڪنري ۾ پيدا ٿيندڙ مرچ پنهنجي رنگ ۽ ذائقي سبب مشهور آهن. پاڻي جي کوٽ ۽ پروسيسنگ جون سهولتون قائم ڪرڻ سان افلاٽوڪسين جي واڌ کي گهٽائڻ ۽ بين الاقوامي مارڪيٽ ۾ سندس معيار ۽ گهرج کي بهتر بنائڻ ۾ مدد ملندي جنهن سان پرڏيهي مٽاسٽا لاءِ مددگار آهي. وڏي وزير چيو ته سنڌ زرخيز زمينن ۽ گهڻ رخي آبهوا سان مالامال آهي ۽ ان ۾ زرعي صلاحيت جا وڏا ذخيرا موجود آهن. هن چيو ته اسان جو صوبو زراعت ۾ پنهنجي تاريخي، پائيدار ۽ جديد طريقن لاءِ سندن وسيلن مان فائدو کڻڻ لاءِ تيار آهي. ۽ وڌيڪ چيو ته جيئن اسان چيني زرعي شين جي Sichuan Letong ڪمپني جي ڪاميابين جو جائزو ورتو آهي، اسان ترقي لاءِ پارٽنرشپ جوڙڻ لاءِ تيار آهيون جنهن سان زرعي شعبي کي هٿي وٺرائندي هارين کي خاص فائدا ملندا. جسٽس باقر چيو ته پاڪستان ۾ 143000 ايڪڙ کان وڌيڪ مرچن جي پوک ڪئي وڃي ٿي جنهن مان 144000 ميٽرڪ ٽن پيداوار ٿئي ٿي. هن چيو ته سنڌ قومي پيداوار ۾ 80 سيڪڙو حصو ڏئي ٿي ۽ سنڌ ۾ مرچ پوکڻ وارا وڏا ضلعا عمرڪوٽ، بدين، ميرپورخاص، ٺٽو، ڄامشورو، سانگهڙ، ٽنڊوالهيار، ٽنڊو محمد خان، دادو ۽ شڪارپور آهن. چين ۽ پاڪستان جي وچ ۾ واپار، تعاون ۽ صنعتي پارٽنرشپ جا وڏا امڪان آهن. وڏي وزير چيو ته گڏيل ڪوششون هڪ مثالي نمونو آهي جنهن مان ظاهر ٿئي ٿو ته اهڙيون پارٽنرشپ ڪيئن معاشي فائدا، روزگار جا موقعا ۽ ثقافتي مفاهمت کي هٿي وٺرائي سگهن ٿا. هن وڌيڪ چيو ته تعاون جو امڪان ٻنهي قومن جي روشن مستقبل جي ضمانت آهي، هن پاڪستان کان چين تائين مرچن جي افتتاحي کيپ بابت نيڪ خواهشن جو اظهار ڪندي چيو ته هي سنگ ميل تجارتي اهميت کان مٿانهون آهي ڇوته اهو اسان جي گڏيل ڪوششن جي مڪمل ٿيڻ جي علامت آهي. ۽ وڌيڪ چيو ته اهو ڪيترن ئي ڪامياب منصوبن منجهان هڪ آهي جيڪي واپار لاء نوان رستا کوليندو ۽ ٻنهي ملڪن جي وچ ۾ اقتصادي لاڳاپا مضبوط ڪندا. وڏي وزير چيني سيچوان ليٽونگ ڪمپني، چيني سفارتخاني ۽ زراعت کاتي، فوڊ سيڪيورٽي ۽ پلانٽ پروٽيڪشن کاتي پاران اهم ڪردارن کي ساراهيو. هن چيو ته سنڌ هڪ اهڙو صوبو آهي جيڪو پنهنجي شاهوڪار تاريخ، ثقافتي ورثي ۽ اڻ کٽ زرعي صلاحيت سبب نمايان آهي. هن وڌيڪ چيو ته برآمدي تقريب چين-پاڪستان دوستي کي هٿي وٺرائڻ ۽ اقتصادي سهڪار کي اڳتي وڌائڻ جي سلسلي ۾ ڪيل مثالي اڳڀرائي جو ثبوت آهي جنهن جو مثال اسان جي محنتي هارين ۽ سيچوان ليٽونگ ڪمپني ٻنهي جي فخر جوڳي ڪاميابين جو مثال آهي. جسٽس باقر جو چوڻ هو ته بيلٽ اينڊ روڊ انيشيٽو ۽ چائنا-پاڪستان اقتصادي راهداري جهڙن قدمن اسان جي قومن ۾ لاڳاپا قائم ڪيا آهن جيڪو هڪ گهري دوستي جي عڪاسي ڪري ٿو ۽ اهو وقت جو امتحان پڻ آهي. هن وڌيڪ چيو ته اهي فريم ورڪ رڳو جيو پوليٽيڪل تعميرات نه آهن پر اهي انهن رشتن جي مضبوطيءَ جي علامت آهن جيڪي اسان کي پاڻ ۾ ڳنڍيندا آهن. هن چيو ته اڄ اسان جن گڏيل ڪوششن کي اجاڳر ڪري رهيا آهيون، اهي دوستي جي گهرائي ۽ گڏيل خوشحالي لاءِ عزم کي ظاهر ڪن ٿا. چيني ڪمپني Sichuan Letong ايندڙ سال حيدرآباد ۽ فيصل آباد ۾ مرچ پروسيسنگ جا ٻه پلانٽ لڳائڻ جو اعلان ڪيو آهي.
