ڪراچي(ايڊيٽر ڊيسڪ)شام ملڪ جيڪو اولهه ايشيا ۾، ميڊيٽرينين سمنڊ جي اوڀر واري ڪناري تي واقع آھي. هن جون سرحدون اتر ۾ ترڪي، اوڀر ۽ ڏکڻ اوڀر ۾ عراق، ڏکڻ ۾ اردن، ۽ ڏکڻ اولهه ۾ اسرائيل ۽ لبنان سان لڳن ٿيون. شام جي گاديءَ جو هنڌ دمشق آهي جيڪو آبادي جي لحاظ کان سڀني کان وڏو شهر آهي. ملڪ جي ڪل آبادي اندازي مطابق اڍائي ڪروڙ آهي. شام جي ڪل ايراضي 185کان 180 هم چورس ڪلوميٽر آهي. شام جي سرڪاري ٻولي عربي آهي، پر ڪردش، آرمينيائي، فرينچ ۽ انگريزي پڻ ڳالهائي وڃي ٿي. اڪثريت آبادي جو مذهب سني اسلام آهي، شيعه فرقن سان گڏ ڪرسچن ۽ ڊروز سميت اقليت جا ماڻهو به هتي آباد آهن. جديد شام 1946 ۾ فرانس کان پنهنجي آزادي حاصل ڪئي، جنهن کانپوءِ هن 1949 ۽ 1971 جي وچ ۾ ڪيترن ئي فوجي بغاوتن کي منهن ڏنو ۽ ملڪ ۾ ڪافي سياسي عدم استحڪام ڏٺو. 1958 ۽ 1961 جي وچ ۾ اهو مختصر طور تي مصر سان شامل ٿي گڏيل عرب جمهوريه بڻجي ويو هو. خاص طور تي، 1963 جي بغاوت ڏٺي، عرب سوشلسٽ بعث پارٽي جي حڪومت قائم رهي. جنرل حافظ الاسد 1970 ۾ اقتدار تي قبضو ڪيو، هڪ جابر سياسي نظام قائم ڪيو. 2000ع ۾ سندس وفات کان پوءِ سندس پٽ بشار الاسد صدارت جو وارث ٿيو. هن ملڪ مردن جي سراسري عمر 68 سال ۽ عورتن جي ڄمار 75 سال رڪارد ٿيل آهي. اڪثريت سني مسلمانن جي آهي پر اسد فيملي جي اقتدار سنڀالن بعد علوي شيعن جو حڪومتي معاملن تي ڪنٽرول رهيو. 2011 ۾ عرب اپرنگ دوران هتي بغاوت شروع ٿي جنهن کي روس ۽ ايران جي مدد سان 2017 ۾ بشار الاسد ڪچلڻ ۾ ڪامياب رهيو. مشهور مسلمان ڪمانڊر خالد بن وليد ۽ حضرت امام حسين جي خاندان جي ڪجهه فردن جون مزارون به هتي آهن. خالد بن وليد جي سربراهي ۾ عرب فوج 636 عيسوي ۾ يرموڪ جي جنگ ۾ بازنٽائن امپائر جي فوج کي شڪست ڏئي اقتدار سنڀاليو هو. هن ملڪ جي ميڊيا ٽن حصن ۾ ورهايل آهي، هڪ گروپ حڪومت نواز، ٻيو مخالف نواز ۽ ٽيون ڪرد نواز گروپ آهي. شام جنهن کي انگريزي ۾ سيريا سڏيو ويندو آهي، تنهن جي تفصيلي تاريخ پڙهڻ لاءِ هن لنڪ تي ڪلڪ ڪريو.
شام جو معزول صدر بشار الاسد ۽ سندس خاندان روس پهچي ويا آهن.روسي ذريعن ۽ برطانوي ميڊيا دعويٰ ڪئي آهي ته بشار الاسد پنهنجي ڪٽنب سميت ماسڪو پهچي ويو آهي.روسي نيوز ايجنسي ڪرملن جي حوالي سان ٻڌايو آهي ته روس بشار الاسد ۽ سندس خاندان کي سياسي پناهه ڏني آهي.نيوز ايجنسي موجب روسي عملدار شامي اپوزيشن جي نمائندن سان رابطي ۾ آهن، جن شام ۾ روسي اڏن ۽ سفارتڪارن جي حفاظت جي ضمانت ڏني آهي.
