ڪراچي(اسٽاف رپورٽر) سنڌ جي وڏي وزير مراد علي شاهه سان گڏيل عرب امارات جي قونصل جنرل ملاقات ڪري کيس گڏيل عرب امارات جي قومي ڏينهن ۾ شرڪت جي دعوت ڏني آهي. سنڌ جي وڏي وزير مراد علي شاهه سان گڏيل عرب امارات جي قونصل جنرل بخيت عتيق الريميثيڪي ملاقات ڪئي. ملاقات دوران وڏي وزير مراد علي شاهه کي قونصل جنرل گڏيل عرب امارات جي قومي ڏينهن ۾ شرڪت جي دعوت ڏني. يو اي اي قونصل جنرل جو چوڻ آهي ته گڏيل عرب امارات پنهنجي قومي ڏينهن تي سنڌ جي ثقافت جو ڏينهن به ملهائيندي. وڏي وزير جي ترجمان موجب، وڏي وزير مراد علي شاهه جي گڏيل عرب امارات جي قونصل جنرل جي ملاقات دوران ڪراچي ۾ مختلف منصوبن ۾ يو اي اي جي ڪمپنين جي سيڙپڪاري بابت ڳالهيون ڪيون ويون. وڏي وزير مراد علي شاهه اڄ انويسٽمينٽ ڊپارٽمينٽ ۽ گڏيل عرب امارات جي لاڳاپيل آفيسرن جي ملاقات طئي ڪرائي. يو اي اي ڪمپنيون ڪراچي ۾ ڊي سيلينيشن پلانٽ، ٽرانسپورٽ، روڊن ۽ پلن جي تعميراتي ڪم جي شعبن ۾ سيڙپڪاري ۾ دلچسپي رکن ٿيون.
