واشنگٽن (ڊيسڪ نيوز) سعودي عرب جي ولي عهد شهزاده محمد بن سلمان چيو آهي ته ”مان صحافي جمال خاشقجيءَ جي قتل جي ذميواري قبول ڪيان ٿو ڇو ته اهو منهنجي اقتدار جي وقت ۾ ٿيو آهي“. واضح رهي ته سعودي عرب جي استنبول ۾ قائم سفارتخاني اندر ٿيل قتل بابت سعودي شهازدي هن کان اڳ ڪو به تبصرو ناهي ڪيو. جڏهن ته آمريڪي ڳجهي اداري سي آءِ اي سميت سڄي دنيا جي ميڊيا ۽ ترڪ حڪومت چوندي رهي ته جمال جي قتل ۾ سعودي شهزادي جو هٿ آهي ۽ سعودي اختيارين بار بار اهو ئي چيو ته سعودي ولي عهد جو قتل ۾ ڪوئي ڪردار ناهي. سعودي شهزادي قتل جي ذميواري هاڻي ”دي ڪرائون پرنس آف سعودي عرب“ نالي دستاويزي فلم جي ابتدائي نماءَ وقت پي بي ايس اداري جي مارٽن اسمٿ سان ڳالهه ٻولهه ڪندي قبول ڪئي آهي. سعودي شهازي چيو ته ”منهنجي اقتدار وارن ڏينهن ۾ ٿيڻ ڪري مان ان جي پوري ذميواري قبول ڪيان ٿو“. مارٽن اسمٿ سعودي ولي عهد کان سوال ڪيو ته توهان کي ڄاڻ هجڻ کانسواءِ قتل ڪيئن ٿيو؟ ته ان جي جواب ۾ محمد سلمان چيو ته ”اسان وٽ 02 ڪروڙ ماڻهو آهن، اسان وٽ 30 لک سرڪاري ملازم آهن“. ان تي مارٽن اسمٿ ٻيو سوال ڪيو ته ”ڇا اهي توهان جو جهاز به استعمال ڪري سگهن ٿا؟“ سعودي ولي عهد جواب ڏنو ته ”مون وٽ ڪيترا ئي آفيسر ۽ وزير آهن جيڪي معاملن کي ڏسندا آهن، اهي ئي ذميدار آهن، انهن وٽ اختيار آهن ايئن ڪرڻ جا“. اهو پڻ ياد رهي ته گڏيل قومن جي هڪ رپورٽ ۾ به سعودي ولي عهد ۽ ٻين سعودي عملدارن خلاف جاچ ڪرڻ تي زور ڀريو ويو هيو.
