ڪراچي(ويب ڊيسڪ)صدر آصف علي زرداري ڪراچي جي نجي اسپتال ۾ زير علاج آهن. جيو نيوز سان ڳالهائيندي صدر مملڪت جي ذاتي معالج، ڊاڪٽر عاصم حسين ٻڌايو ته صدر آصف علي زرداري جو ڪورونا ٽيسٽ مثبت آيو آهي ۽ انهن کي آئسوليشن ۾ رکيو ويو آهي. ڊاڪٽر عاصم حسين موجب، آصف علي زرداري انفيڪشنز جي بيمارين جي ماهر ڊاڪٽرز جي نگراني هيٺ آهن ۽ انهن سان ملاقاتن تي مڪمل پابندي لڳائي وئي آهي. ڊاڪٽر عاصم حسين وڌيڪ چيو ته صدر مملڪت جا مختلف ٽيسٽ ڪيا ويا آهن ۽ انهن جي مڪمل مانيٽرنگ ڪئي پئي وڃي. ياد رهي ته گذريل ڏينهن صدر مملڪت آصف علي زرداري کي طبيعت خراب ٿيڻ سبب نواب شاهه مان ڪراچي منتقل ڪيو ويو هو ۽ هو ڪراچي جي نجي اسپتال ۾ زير علاج آهن.
