اسلام آباد(بيورو رپورٽ)صدر آصف علي زرداري ۽ وزيراعظم شهباز شريف قوم کي عيدالفطر جي موقعي تي دل جي گهراين سان مبارڪون پيش ڪيون آهن. صدر عيد اباڻي شهر نوابشاهه ۽ وزيراعظم لاهور جي ماڊل ٽائون ۾ عيد ملهائي. پنهنجن الڳ الڳ پيغامن ۾، هنن زور ڏنو ته هي ڏينهن خوشي، شڪرگذاري، ڀائپي ۽ همدردي جا سبق سيکاري ٿو. صدر زرداري چيو ته عيدالفطر اتحاد ۽ يڪجهتي جي اهميت سيکاري ٿي، جيڪا هر ڪنهن کي هڪ ٻئي جي مدد ڪرڻ ۽ پاڪستان کي ترقي ۽ خوشحالي ڏانهن وٺي وڃڻ ۾ پنهنجو حصو وجهڻ جي ترغيب ڏئي ٿي. هن ڀارت جي والاريل ڪشمير جي عوام لاءِ به دعا ڪئي، الله پاڪ کان التجا ڪئي ته کين آزادي عطا فرمائي ۽ جلد عيد جون خوشيون نصيب ڪري. ساڳئي وقت، وزيراعظم شهباز شريف چيو آهي ته پاڪستان هن وقت اندروني ۽ ٻاهرين دشمنن جي خطري کي منهن ڏئي رهيو آهي. هن انتهاپسندي، نفرت، ۽ فرقيواريت جي هر صورت کان پاسو ڪرڻ جي ضرورت تي زور ڏنو. ملڪ جي سالميت ۽ استحڪام کي يقيني بڻائڻ لاءِ، هن اتحاد ۽ سجاڳي جي اپيل ڪئي ته جيئن ڪنهن به سازش کي ڪامياب ٿيڻ کان روڪيو وڃي. وزيراعظم چيو ته حڪومت اقتصادي بحالي، امن امان جي بحالي، ۽ سماجي استحڪام کي يقيني بڻائڻ لاءِ پوري ڪوشش ڪري رهي آهي. هن دهشتگردي خلاف جنگ ۾ پاڪستان جي هٿياربند فوج جي قربانين کي خراج تحسين پيش ڪيو ۽ شهيدن جي وارثن سان يڪجهتي جو اظهار ڪيو. هن جعفر ايڪسپريس هائي جيڪنگ واقعي جي شهيدن لاءِ به دعا ڪئي. وزيراعظم شهباز شريف عوام کي ياد ڏياريو ته اهي فلسطين ۽ والاريل ڪشمير جي مظلوم ڀائرن ۽ ڀينرن کي به نه وسارين، جيڪي آزادي جي جدوجهد ۾ مصروف آهن. هن انهن جي لاءِ پاڪستان جي اڻٽر حمايت جو اعادو ڪيو ۽ بين الاقوامي برادري کي اپيل ڪئي ته اهي انساني حقن جي ڀڃڪڙين کي روڪڻ ۽ انهن بيگناهه مسلمانن کي انصاف فراهم ڪرڻ لاءِ ترت قدم کڻن.
