دوحه (م ڊ) افغانستان ۾ امن بابت آمريڪي خاص ايلچي زلمي خليل زاد دعويٰ ڪئي آهي ته آمريڪا ۽ افغان طالبان وچ ۾ هلندڙ ڳالهيون ڪامياب آهن ۽ معاهدي جي ويجهو پهچي چڪيون آهن. هن اميد ظاهر ڪئي ته ٿيندڙ معاهدي سان نه صرف افغانستان ۾ تشدد ۾ گهٽتائي ايندي پر خطي ۾ استحڪام ايندو. قطر ۾ هلندڙ امن ڳالهين جي نائين ڏينهن جي ختم ٿيڻ تي سماجي رابطي جي ويب سائيت ٽوئٽر تي جاري ڪيل بيان ۾ افغان ڄائي آمريڪي سفارتڪار زلمي خليل زاد چيو آهي ته امن معاهدي جو نائون دور مڪمل ٿي ويو آهي ۽ هاڻ هو ان سلسلي ۾ ڪابل حڪومت سان ڳالهيون ڪندا. عالمي خابرو ادارن موجب زلمي خليل زاد اڄ افغانستان روانو ٿيندو جتي هو صدر اشرف غني ۽ ان جي حڪومت جي ٻين اعليٰ اختيارين سان طلبان سان ٿيل ڳالهين ۾ پيش رفت بابت ڳالهيون ڪندو. افغان مفاهمتي عمل ۾ آمريڪي ڳالهين جي وفد جي اڳواڻي ڪندڙ سفارتڪار جو بيان اهڙي وقت ۾ سامهون آيو آهي جڏهن قندوز تي گذريل ڏينهن وڏو حملو ڪيو ويو هو. زلمي خليل زاد موجب امن معاهدي کان پوءِ اهڙو افغانستان دنيا جي سامهون ايندو جيڪو پنهنجي زمين ڪنهن به قسم جي دهشتگردي جي خلاف استعمال ڪرڻ جي ڪنهن کي به اجازت نه ڏيندو. آمريڪا ۽ افغان طالبان وچ ۾ امن جي لاءِ ڪيل معاهدن جي حوالي سان باقاعده ڳالهين جي شروعات هلندڙ سال جي شروعات ۾ ٿي هئي. ڳالهين جي شروعات کان اڳ ۽ ڳالهين دوران به ڪيترائي دفعا افغان طالبان جي طرفان واضح طور تي چيو ويو ته هو افغانستان حڪومت سان ڪابه ڳالهه ٻولهه نه ڪندا. هنن جو اهو به زور رهيو ته جيستائين آمريڪي فوج افغانستان مان نه نڪرندي ان وقت تائين طالبان جون ڪارروايون به ختم نه ٿينديون. آمريڪي صدر ڊونلڊ ٽرمپ گذريل ڏينهن واضح ڪيو هو ته آمريڪي مفادن جي تحفظ لاءِ هو اٺ هزار کان وڌيڪ فوجي افغانستان ۾ مقرر ڪندو. هن وڌيڪ چيو ته جيڪڏهن افغانستان مان دهشتگرد گروپ وري ٻيهر آمريڪا تي حملو ڪيو ته اسان ايتري طاقت سان گڏ واپس اينداسين جنهن جو ڪنهن کي وهم ۽ گمان به نه هوندو.
