لاهور (ويب ڊيسڪ) پاڪستان جي سپر اسٽار بيٽسمين ظهير عباس کي انٽنيشنل ڪرڪٽ جي هال آف فيم ۾ شامل ڪرڻ تي پاڪستان ڪرڪٽ بورڊ جي چيئرمين احسان ماني کيس مبارڪباد ڏني آهي. 1969 ۾ نيوزيلينڊ خلاف ٽيسٽ ڪيپ حاصل ڪندڙ ظهير عباس تمام بهترين بيٽسمين هو جڏهن ڪرڪٽ جي دنيا ۾ فيلڊنگ جا رولز نه هئا ۽ ڪپتان سڀني رانديگرن کي بائونڊري تي به مقرر ڪري سگهندو هو ان زماني ۾ کيس رنز جي مشين سڏيو ويندو هو ۽ هنکي ايشيائي سر بريڊ مين به سڏيندا هئا. هن آزري ٽيسٽ ميچ 1985 ۾ سريلنڪا خلاف کيڏي ۽ آخري ون ڊي به هڪ مهيني بعد ساڳئي سال نومبر ۾ سريلنڪا خلاف کيڏي رٽائرمينٽ ورتي. 1974 ۾ ون ڊي انگلينڊ خلاف کيڏي ڪيريئر جي شروعات ڪئي هئي. هي دنيا جو واحد پليئر آهي جنهن فرسٽ ڪلاس ڪرڪٽ ۾ 4 ڀيرا سينچري ۽ 4 ڀيرا ڊبل سينچري اسڪور ڪئي، 8 ئي اننگز ۾ ناٽ آئوٽ رهيو. هن انڊين ڇوڪري ريتا لٿرا سان 1988 ۾ شادي ڪئي جيڪا هاڻي ٽمينه عباس آهي. هو آءِ سي سي جو صدر به رهيو. ياد رهي ته هال آف فيم ۾ شامل 93 ڪرڪٽرز مان ظهير عباس ڇهون رانديگر آهي. ان کا اڳ حنيف محمد، عمران خان، جاويد ميانداد، وسيم اڪرم ۽ وقار يونس شهرت جي ان هال ۾ شامل آهن. انگلينڊ جا 28، آسٽريليا جا 27، ويست انڊيز جا 18، ڀارت جا 6، ڏکڻ آفريڪا جا 4، نيوزيلينڊ جا 3 ۽ هڪ سريلنڪا جو ڪرڪٽر اهو اعزا رکي ٿو.
