لاهور(ويب ديسڪ) پاڪستان ڪرڪيٽ بورڊ جي چيئرمين محسن نقوي آچر تي مردن جي قومي ڪرڪيٽ ٽيم لاءِ 7 ميمبرن تي ٻڌل سليڪشن ڪميٽي جو اعلان ڪيو آهي. لاهور جي قذافي اسٽيڊيم ۾ پريس ڪانفرنس ڪندي نقوي چيو ته سليڪشن ڪميٽي کي ٻيهر منظم ڪيو ويو آهي ۽ هاڻي 7 ميمبرن تي مشتمل هوندي. هن چيو ته ڪميٽي جو هاڻي چيئرمين نه هوندو ۽ سمورن 7 ميمبرن کي برابر جا اختيار هوندا. ”اهي اڪثريت جي بنياد تي فيصلا ڪندا ته جيئن اسان بهتر نتيجي ڏانهن وڃي سگهون “. پريس ڪانفرنس ۾ نقوي سان گڏ وهاب رياض، محمد يوسف، اسد شفيق ۽ عبدالرزاق به شامل هئا، جن کي پي سي بي سربراهه چيو ته اهي سڀئي نئين ڪميٽي جو حصو آهن. نقوي جو چوڻ هو ته پاڪستاني ٽيم جو ڪپتان ۽ هيڊ ڪوچ به سليڪشن ڪميٽي جا ميمبر هوندا ۽ ان سان گڏ ”ڊيٽا پرسن“ به هوندو. هن چيو ته ٽيم جي چونڊ ۾ چيئرمين جي راءِ شامل نه هوندي، اسين مئنيجمينٽ آهيون ۽ هي پروفيشنل ڪرڪيٽر آهن، هاڻي ايئن نه ٿيندو ته فون آئي آهي فلاڻي رانديگر کي کيڏايو. اميد ته سٺو نتيجو ملندو.هن چيو ته چئن پنجن ڏينهن ۾ ڪوچز جي حوالي سان به سٺي خبر ملندي، هن وقت ڪجهه نٿو ٻڌائڻ چاهيان، اڳ ۾ هڪ ڪوچ جو نالو ميڊيا ۾ آيو ته هو ڀڄي ويو. هڪ سوال تي هن چيو ته عماد وسيم واپس اچي پيو اسانجي ٽيم بهترين هوندي. هن بڌايو ته حارث رئوف جو سينٽرل ڪانٽريڪٽ بحال ڪريون پيا. هڪ سوال تي هن چيو ته پاڪستان سپر ليگ ۾ وڌيڪ ٽيمون شامل ڪنداسين. ياد رهي ته محمد عامر به رٽائرمينٽ جو فيصلو واپس وٺي ڇڏيو آهي. نيوزيلينڊ جي ٽيم 5 ٽي ٽوئنٽي ميچز جي سيريز کيڏڻ پاڪستان اچي پئي ۽ 18 اپريل کان لاهور ۽ راولپنڊي ۾ ميچز کيڏيون وينديون. پهرين جون کان ٽي ٽوئنٽي ورلڊ ڪپ آمريڪا ۾ ٿي رهيو آهي. آمريڪا ۽ ڪئناڊا جون ٽيمون پهريون ڀيرو ورلڊ ڪپ کيڏنديون.
