جده (ويب ڊيسڪ) پاڪستان جي وزيراعظم عمران خان سعودي عرب جي بادشاهه شاهه سلمان ۽ ولي عهد محمد بن سلمان سان ڌار ڌار ملاقاتون ڪيون آهن. انهن ملاقاتن جو بظاهر مقصد ته والاريل ڪشمير ۾ ڀارتي ظلمن بابت اقوام متحده جي جنرل اسمبلي ۾ ڀرپورآواز اٿارڻ آهي پر ملاقاتون اهڙي وقت ۾ ٿيون آهن جڏهن سعودي عرب تيل تنصيبات ٿيل حملن بعد انتهائي مشڪل صورتحال ۾ آهي. وزيراعظم عمران خان انهن حملن جي مذمي ڪندي چيو آهي ته حرمين شريفين سڀني مسلمانن لاءِ مقدس آهي ۽ جيڪڏهن ان کي ڪو خطرو پيد ٿيو ته پاڪستان سعودي عرب سان گڏ هوندو. هن گذريل ڏينهن ڪشمير صورتحال بابت سفارتي رابطن بابت ۽ والاريل ڪشمير جي صورتحال بابت ولي عهد کي بريف ڪيو هو.
ملاقات ۾ حفيظ شيخ، ذلفي بخاري ، پرڏيهي کاتي جو سيڪريٽري سهيل محمود ۽ سعودي عرب ۾ پاڪستاني سفير راجا علي اعجاز به موجود هئا. سعودي تي ٿيل حملن جو سڌي طرح الزام آمريڪا ايران تي ڏنو هو ۽ سعودي عرب جو چوڻ آهي ته حملو ايران جو اسپانسرڊ آهي ۽ هٿيار ايراني آهن. عمران خان ٻن ڏينهن جي دوري تي خميس تي سعودي پهتو۽ جمع تي هو آمريڪا روانو ٿي ويندو. هو اهڙي وقت سعودي عرب جي دوري تي آهي جڏهن سعودي عرب پاڻ پريشان آهي ۽ سڄي وچ اوڀر ۾ ڇڪتاڻ واري صورتحال آهي. ياد رهي ته آمريڪي پرڏيهي وزير مائيڪ پومپيو به سعودي عرب ۾ آهي ۽ هن پڻ سعودي ولي عهد سان ملاقات ڪئي آهي. صدر ٽرمپ 22 سيپٽمبر تي ڀارتي وزيراعظم نريندرا مودي سان گڏ ٽيڪساس ۾ جلوس کي خطاب ڪندو ۽ 23 تي عمران خان سان ملندو ۽ هن جي ڪوشش آهي ته هو ڪشمير بابت ڪو بريڪ ٿرو ڪرائي سگهي.
