ڪراچي(ويب ڊيسڪ) انساني حقن جي عالمي اداري هيومن رائيٽس واچ (ايڇ آر ڊبليو) چيو آهي ته اسرائيل غزا جي شهري آبادي جو پاڻي بند ڪري لائينون تباهه ڪري فلسطينين جي نسل ڪشي ڪري رهيو آهي. ايڇ آر ڊبليو عالمي برادري تي زور ڀريو آهي ته هو اسرائيل تي ٽارگيٽيڊ پابنديون مڙهي. جاري ڪيل تازي رپورٽ م ايڇ آر دبليو چيو آهي ته گذريل هڪ سال کان اسرائيل ڄاڻي واڻي غزا جي شهرين کي جيپي جي بنيادي سهولت پاڻي کان محروم رکڻ لاءِ لڳاتار اهڙا قدم کنيا آهن جيڪي نسل ڪشي جي دائري ۾ اچن ٿا. اسرائيل ايڇ آر دبليو جي رپورٽ کي ڪوڙو قرار ڏنو آهي. رپورٽ ۾ چيو ويو آهي، پاڻي جي لائين تي لڳل پمپنگ اسٽيشن جي سولر سيسٽم کي تباهه ڪيو آهي، جنريٽرز لاءِ تيل جي سپلاءِ بند ڪئي آهي، پاڻي جون لائينون تباهه ڪيون آهن ۽ سپلاءِ به بند ڪري ڇڏي آهي. رپورٽ موجب پاڻي جي لائينن جي مرمت لاءِ گهربل سامان گهرائڻ تي به اسرائيل پابندي مڙهي آهي. ياد رهي ته غزا جي جنگ ۾ 45 هزار کان مٿي شهري مارجي ويا آهن، سوين ماڻهو تباهه ٿيل عمارتن جي ملبي ۾ دٻيل آهن. شهر کنڊر بڻجي ويو آهي، اسپتالون ۽ تعليمي ادارا به تباهه ڪيا ويا آهن. اسرائيلي ڊرونز ٻارن جي روئڻ ۽ مدد لاءِ پڪار جا آواز ڏئي رهيا آهن، جيئن ئي مدد لاءِ فلسطيني لڪل جاين تان ٻاهر اچن ٿا ته انهن کي قتل ڪيو ٿو وڃي.
