اسلام آباد(بيورو رپورٽ) آرمي چيف جنرل قمر جاويد باجوا چيو آهي ته قومي سلامتي ۽ ميعشت جو پاڻ ۾ گهاٽو لاڳاپو آهي ۽ ملڪ ۾ اندروني سلامتي جي صورتحال بهتر ٿيڻ سبب معاشي ترقي ۽ سرگرمين لاءِ گنجائش ۾ اضافو ٿيو آهي. اهڙو اظهار هن جي ايڇ ڪيو جي آڊيٽوريم ۾ “سلامتي ۽ معيشت جي ٻه طرفي مداخلت” جي عنوان سان منعقد ڪيل سيمينار جي اختتامي سيشن کي خطاب ڪندي ڪيو. هي سيمينار حڪومت جي معاشي ٽيم ۽ ملڪ جي وڏن تاجرن جي ويجهڙائي کان هڪٻئي جو موقف سمجهڻ، تجويزون ڏيڻ ۽ بحث مباحثو ڪرڻ خاطر منعقد ڪيو ويو. آرمي چيف بعد ۾ تاجرن جي مان ۾ ڊنر پڻ ڏنو. اربع تي ٿيل ان اهم اجلاس بابت معلومات حاصل ڪرڻ لاءِ ميڊيا سميت سڀني شعبن ۾ دلچسپي ظاهر ڪئي پئي وئي پر خميس تي فوجي ترجمان ان بابت بيان جاري ڪيو. جنهن ۾ ٻڌايو ويو آهي ته آرمي چيف چيو ته سلامتي جي ضرورتن ۽ معاشي ترق جي توازن سان ئي خوشحالي لاڳاپيل آهي. ترجمان موجب حڪومتي ٽيم ڪاروبار ۾ واڌاري لاءِ طريقه ڪار کي آسان بنائڻ ۽ ٽيڪس جي نظام کي بهتر ڪرڻ ۽ سادو بنائڻ بابت بريفنگ ڏني، تاجرن حڪومت سان تعاون ۽ ٽيڪس ادا ڪرڻ جي خاطري ڪرائي آهي. ياد رهي ته مسلم ليگ (ن) جي احسن اقبال مولانا فضل الرحمان سان ملاقات بعد ميڊيا سان ڳالهائيندي چيو هو ته تاجرن آرمي چيف کي حڪومت جي ناڪام معاشي پاليسين سبب ڪاروبار تباهه ٿيڻ جي شڪايت ڪئي آهي. هن اهو سواليه انداز ۾ چيو هو ته جيڪڏهن حڪومت جي سمورين ناڪامين جي ذميواري عسڪري قيادت تي وڌي وئي ته ان جو ڇا ٿيندو. آرمي چيف تاجرن کي اهو باور ڪرايو ته فوج حڪومت سان تجارتي فيصلن جي حمايت ڪري ٿي ۽ ڏکيا فيصلا ملڪ لاءِ ضروري آهن.
