واشنگٽن (ويب ڊيسڪ) گذريل صديءَ جي 25 بااثر عورتن ۾ شمار ٿيندڙ ۽ موسيقي جي دنيا جي راڻي سڏرائيندڙ آمريڪي ڳائڻي، ادڪاره، ليکڪ ۽ موسيقار ميڊونا تي هڪ مداح دير سان ميوزيڪل شو شروع ڪرائڻ تي ڪيس داخل ڪرائي ڇڏيو آهي. ميڊونا گذريل هڪ سال کان آمريڪا ۾ پنهنجي ميوزيڪل فيسٽول منعقد ڪرڻ ۾ مصروف آهي ۽ هلندڙ سال جي آخر ۽ ايندڙ سال جي شروعات تائين هو مختلف شهرن ۾ ميوزيڪل شو منعقد ڪرائيندي. ميڊونا جي ان شو جي هڪ ٽڪيٽ جي قيمت 261 کان 1724 آمريڪي ڊالر رکي وئي آهي شو کي ڏسڻ لاءِ ماڻهن جون قطارون لڳي ويون آهن. جڏهن ته شو جون تمام ٽڪيٽون مقرر ڪيل تاريخ کان 3 مهينا پهرين خريد ٿي چڪيون آهن ۽ مداح شو ختم ٿيڻ کان پوءِ به ڪيترائي ڪلاڪ ان جي پرفارمنس جي سحر ۾ ٻڏل نظر ايندا آهن. ڪجهه وقت اڳ هڪ مداح ٻه ڪلاڪ دير سان شو شروع ڪرڻ تي ميڊونا مٿان ڪيس داخل ڪرائي ڇڏيو آهي. گلوڪاره جي مداح نه صرف ميڊونا پر ان جو شو منعقد ڪرائيندڙ انٽرٽينمينٽ چئنل تي به ڪيس داخل ڪرايو آهي. واضح رهي ته گلوڪاره گذريل مهيني 19 آڪٽومبر تي ميامي بيچ ۾ ٿيندڙ هڪ شو دير سان شروع ڪيو هو جنهن تي ڪيس داخل ڪيو ويو. مداح پنهنجي درخواست ۾ دعويٰ ڪئي آهي ته هن گلوڪاره جي شو لاءِ 10 هزار آمريڪي ڊالر کان وڌيڪ قيمت ۾ 3 ٽڪيٽون خريد ڪيون هيون ۽ ميڊونا جي شو جو وقت رات ساڍي اٺين وڳي لکيل هو پر ان باوجود ٻه ڪلاڪ دير سان شو شروع ڪيو ويو.
