ملتان جي ڪوئٽا کي شڪست، پوائنٽ ٽيبل جي ٽاپ تي برقرار

ملتان(ويب ڊيسڪ)ايڇ بي ايل پاڪستان سپر ليگ ۾ ملتان سلطانز ڪوئيٽا گليڊيئيٽرز کي 13 رنسن تان شڪست ڏئي ايونٽ ۾ چوٿين ڪاميابي حاصل ڪري ورتي. ملتان ۾ کيڏيل پي ايس ايل جي يارهين ميچ ۾ ڪوئيٽا گليڊي ايٽرز ٽاس کٽي ملتان سلطانز خلاف پهرين بالنگ جو فيصلو ڪيو. سلطانز مقرر 20 اوورن ۾ ٽن وڪيٽن جي نقصان تي 180 رنسون ٺاهيون، ريزا هينڊرڪس 72 ۽ ڪپتان محمد رضوان 51 رنسون ٺاهيون. ان کان علاوه عثمان خان 14 ۽ طيب طاهر 35 رنسون اسڪور ڪيون. 181 رنسن جي هدف جي تعاقب ۾ ڪوئيٽا گليڊي ايٽرز جي ٽيم 9 وڪيٽن جي نقصان تي 176 رنسون ٺاهي سگهي، خواجه نافع 36 رنسون ۽ ڪپتان ريلي روسو 30 رنسون ٺاهي نمايان رهيا. ان کان علاوه سعود شڪيل 24 ۽ شرفين ردرفورڊ 21 رنسون ٺاهيون، جيسن راءِ 12 ۽ محمد عامر 12 رنسون ٺاهيون. ملتان سلطانز طرفان محمد علي ۽ ڊيوڊ ڊولي 3-3 وڪيٽون ورتيون، آفتاب ابراهيم 2 ۽ اساما مير هڪ رانديگر کي آئوٽ ڪيو. ٽورنامينٽ ۾ هينئر تائين ملتان سلطانز 5 ميچون کيڏيون آهن ۽ 4 ۾ ڪاميابي حاصل ڪئي آهي، جڏهن ته ڪوئيٽا 4 ميچز مان 3 ميچن ۾ ڪاميابي ۽ هڪ ۾ ناڪام رهي آهي. پوائنٽس ٽيبل تي ملتان پهرين ۽ ڪوئيٽا ٻئي نمبر تي آهي.