اسلام آباد(بيورو رپورٽ) انفارميشن ٽيڪنالاجي بابت مملڪتي وزير شزا فاطمه چيو آهي ته ملڪ ۾ انٽرنيٽ مڪمل طور تي فنڪشنل آهي ۽ واٽس ايپ سميت سڀ موبائل ايپس پوري طرح هلي رهيو آهن.قومي اسمبلي اجلاس ۾ سوالن جي وقفي دوران پيپلز پارٽي جي ميمبر شازيه مري سوال ڪيو ته پاڪستان ۾ انٽرنيٽ جو مسئلو ڪيستائين حل ٿيندو؟ جنهن جي جواب ۾ شزا فاطمه چيو ته ملڪ ۾ هن وقت انٽرنيٽ مڪمل طور تي فنڪشنل آهي ۽ واٽس ايپ سميت سڀ موبائل ايپس پوري طرح ڪم ڪري رهيون آهن. شزا فاطمه چيو ته ملڪ ۾ سڀني اسٽيڪ هولڊرز سان رابطي ۾ آهيون، هلندڙ سال هنيئر تائين آءِ ٽي گروٿ ۾ 28 سيڪڙو واڌ آئي آهي ۽ هن شعبي ۾ 1.8 ارب ڊالر جي ايڪسپورٽ ٿي آهي. مملڪتي وزير ٻڌايو ته سب ميرين ڪيبل جي اَپ گريڊيشن تي ڪم ٿي رهيو آهي، ڪيبل ڪنيڪٽيويٽي سان سينٽرل ايشيا ۽ چين جو سڄو انٽرنيٽ ڊيٽا پاڪستان مان ٿي ويندو. هن وڌيڪ چيو ته ملڪ ۾ آءِ پي رجسٽريشن لاءِ پي ٽي اي باضابطا ڪم شروع ڪري ڇڏيو آهي، وي پي اين ۽ آءِ پي جي رجسٽريشن بنا ڪنهن معاوضي جي ڪئي پئي وڃي، هنيئر تائين ڪمپنين ۽ فري لانسرز جا 31 هزار کان وڌيڪ وي پي اينز رجسٽرڊ ٿي چڪا آهن.
