هيوسٽن (ڊيسڪ نيوز) آمريڪا ۾ رهندڙ ڀارتي شهرين پاران هيوسٽن جي هڪ راند واري ميدان ۾ ڀارتي وزيراعظم نريندر موديءَ جي استقبال لاءِ منعقد ٿيل ميڙ ۾ آمريڪي صدر ڊونلڊ ٽرمپ خاص طور تي شرڪت ڪئي.
اهڙيون خبرون ٻه هفتا اڳ هليون هيون ته ٽرمپ غير روايتي طور تي انهيءَ جلسي ۾ شريڪ ٿيندو. ياد رهي ته تاريخ ۾ اهو پهريون ڀيرو آهي ته ڪنهن آمريڪي صدر ڌارئي ملڪ جي حڪمران لاءِ ٿيندڙ جلسي ۾ شريڪ ٿي تقرير ڪئي هجي. ”هائوڊي، مودي“ جي عنوان سان ٿيل انهيءَ ميڙ ۾ اندازو آهي ته پنجاهه هزار کان وڌيڪ ماڻهن شرڪت ڪئي.
انهيءَ موقعي تي خطاب ڪندي ڀارتي وزيراعظم نريندر موديءَ چيو ته ”اهڙن ماڻهن کي به ڪشمير ۾ ڀارت جي فيصلن سان مسئلو ٿي پوي ٿو جن کان پنهنجو ملڪ به سنڀاليو نه ٿو وڃي“. هن چيو ته ”انهن ماڻهن ڀارت خلاف نفرت کي ئي پنهنجي سياست جو محور ٺاهيو آهي ۽ هي اهي ئي ماڻهو آهن جيڪي امن نه ٿا چاهن، دهشتگرديءَ جا حامي آهن ۽ دهشتگردن کي پاليندا آهن“. ڪشمير بابت ڀارتي آئين جي شق 370 جو حوالو ڏيندي موديءَ چيو ته ”اهو ملڪ لاءِ 70 سالن کان وڏو چيلينج هو جنهن کي ڪجهه ڏينهن پهريان ختم ڪيو ويو. انهيءَ آرٽيڪل ڪشمير، لداخ ۽ ڄمونءَ جي عوام کي ترقيءَ کان پري رکيو“. موديءَ چيو ته ٽرمپ ڀارت جو حقيقي دوست آهي جيڪو گرم جوش، دوستاڻي مزاج وارو، پهچ جي لائق، توانا ۽ مزاح جي حِس سان ڀرپور آهي. موديءَ کان پهريان ڊونلڊ ٽرمپ خطاب ڪندي چيو ته ”هي ميڙ تاريخي آهي. مونکي ٽيڪساس اچي خوشي ٿي آهي ڇو ته ڀارت جو وزيراعظم مودي آمريڪا جو سڀ کان سٺو، ويجهو ۽ وفادار دوست آهي. مودي پنهنجي عوام لاءِ غيرمعمولي ڪم ڪندو رهي ٿو“. انهيءَ موقعي تي دفاعي ٺاهن جو ذڪر ڪندي ڊونلڊ ٽرمپ چيو ته انڊيا سان دفاع جي شعبي ۾ ٺاهن ۾ واڌ ٿي آهي ۽ جلد وڌيڪ نوان دفاعي سودا ڪيا ويندا. نومبر ۾ ٻنهي ملڪن جون ٽئي فوجون (بري، بحري ۽ فضائي) گڏيل مشقون ڪنديون. انهن مشقن کي ٽائيگر ٽرائمف جو نالو ڏنو ويو آهي. واضح رهي ته ٽرمپ ۽ موديءَ جي اسٽيج تي اچڻ کان اڳ ڀارت مان خاص طور تي گهرايل 400 فنڪارن ڪيتري دير تائين ڊانس ۽ گيت پيش ڪري تفريح پيش ڪئي.
جڏهن ته موديءَ جي جلسي وقت اسٽيڊيم ٻاهران آميرڪا ۾ رهندڙ پاڪستانين ۽ ڪشميرين ڀارتي حڪومت جي والاريل ڪشمير ۾ هلندڙ ظلمن خلاف احتجاج ڪيو ۽ نعريبازي ڪئي.
