ڪراچي(اسٽاف رپورٽر)لائيو اسٽاڪ ۽ فشريز جي صوبائي وزير محمد علي ملڪاڻي اربع تي نئين کاتي جي چارج سنڀالڻ بعد سنڌ جي وڏي وزير سيد مراد علي شاهه سان ملاقات ڪئي. نئين کاتي بابت صوبائي وزير پنهنجي ٽيم جي ڪپتان کي تفصيلي بريفنگ ڏني. ملاقات دوران سنڌ جي وڏي وزير مڇي مارڻ لاءِ ماحول دوست ۽ جديد طريقا اختيار ڪرڻ جي هدايت ڪئي. هن وڌيڪ چيو ته مالوند ۽ ماهيگيرن جا مسئلا حل ڪري سندن لاءِ آسانيون پيدا ڪيون وڃن. ان موقعي تي صوبائي وزير، وڏي وزير کي سندس هدايتن تي عمل ڪرڻ جي خاطري ڪرائيندي چيو ته چوپائي مال جي بهترين نسل کي فروغ ڏيڻ ۽ مڇي مارڻ لاءِ جديد ٽيڪنالوجي استعمال ڪرڻ لاءِ رٿائون جوڙيون وينديون. ياد رهي ته اڳ ۾ مسٽر ملڪاڻي يونيورسٽيز ۽ بورڊز واري کاتي جو وزير هو. ٻئي پاسي ايڪسائيز کاتو سنڀالڻ واري مڪيش ڪمار چاولا ۽ معاون خصوصي قاسم نويد قمر به ڌارا ڌار ملاقاتون ڪيون. وڏي وزير، چاولا کي منشيات جي خاتمي ۽ ٽيڪس وصولي وڌائڻ لاءِ فوري قدم کڻڻ جي هدايت ڪئي. جڏهن ته قاسم نويد کي هدايت ڪئي ته سرڪاري ۽ نجي شعبي جي تعاون سان ترقياتي رٿائون شروع ڪريو ۽ مختلف شعبن ۾ پرڏيهي سيڙپڪاري آڻڻ لاءِ ڪوششون تيز ڪريو.
