اسلام آباد(بيورو رپورٽ)تحريڪ انصاف پارليامينٽرين جي باني پرويز خٽڪ وفاقي گهرو وزير محسن نقوي سان ملاقات ڪئي آهي.ملاقات ۾ گڏيل دلچسپي جي معاملن، ملڪ جي مجموعي صورتحال ۽ سياسي معاملن تي خيالن جي ڏي وٺ ڪئي وئي.ملاقات ۾ ٻنهي اڳواڻن خيبرپختونخواهه ۾ امن امان جي قيام بابت قدمن تي خيالن جي ڏي وٺ ڪئي ۽ ملڪ جي ترقي ۾ رنڊڪ وجهندڙ عنصرن سان وڙهڻ لاءِ پنهنجي عزم کي ورجايو.پرويز خٽڪ اسلام آباد ۾ احتجاج دوران شرپسندن جي حملي ۾ پوليس ۽ رينجرز اهلڪارن جي شهادت تي گهري ڏک ۽ افسوس جو اظهار ڪيو.ان موقعي تي ڳالهائيندي محسن نقوي چيو ته پاڪستان اسان سڀني جو آهي ۽ اسان سڀني کي گڏجي ان کي اڳتي وڌائڻو آهي، عوام رڳو پنهنجن مسئلن جو حل چاهي ٿو.محسن نقوي جو اهو به چوڻ آهي ته پاڪستان جو مستقبل روشن آهي ۽ دنيا جي ڪا به طاقت ان کي ترقي ڪرڻ کان روڪي نه ٿي سگهي.
