مظفر آباد( ڊيسڪ رپورٽ) ڪشمير جي نيلم وادي ۾ ليسوا جي علائقي ۾ ڪڪر ڦاٽڻ يعني ڪلائوڊ برسٽ بعد آسماني بجلي ڪرڻ سبب برسات ۽ ٻوڏ سبب تباهي مچي وئي. جنهن جي نتيجي ۾24 ڄڻا فوت ۽ ڪيترائي زخمي ٿي پيا آهن. ڪيترائي ماڻهون جن ۾ ٻار ۽ عورتون به شامل آهن، لڙهي ويا آهن. جڏهن آزاد ڪشمير جي علائقي ليسوا ۾ طوفاني برساتن ۽ ٻوڏ سبب ندين ۽ نالن ۾ ٻوڏ اچي وئي جنهن سان مواصلاتي نظام درهم برهم ٿي ويو جڏهن ته موبائيل ۽ انٽرنيٽ سروس معطل ٿي وئي. ٻوڏ جي وڪڙ ۾ اچڻ سبب 2 مسجدون ۽ ڏيڍ درجن کان مٿي گهر لڙهي ويا ۽ 24 ڄڻا فوت ٿي ويا. جن جو لاشون ٻوڏ جي وهڪري ۾ وهي نيلم درياءَ ۾ لڙهي ويون آهن. لينڊ سلائيڊنگ سبب ليسوا بازار مڪمل طور تي تباهه ٿي وئي آهي. ڊي سي نيلم، ايس ڊي ايم ۽ پوليس جون ٽيمون متاثر علائقن ۾ پهچي ويون آهن ۽ متاثر علائقن مان نقصان جي ڄاڻ حاصل ڪرڻ جي ڪوشش ڪئي پئي وڃي. ايس ڊي ايم اي سعيد الرحمان قريشي ٻڌايو ته ٻوڏ جي وهڪري ۾ ڪيترائي ماڻهو گم ٿيڻ جا اطلاع آهن ۽ ڪيترائي گهر تباهه ٿي ويا آهن. هن چيو ته نقصانن جو اندازو لڳايو پيو وڃي ۽ گم ٿيل ماڻهن جي تعداد جي فيصلي ۽ ڳولا جو ڪم پڻ شروع ڪيو ويو آهي، ٻوڏ جي وهڪري ۾ 24 ڄڻا فوت ٿي ويا آهن. جڏهن ته عورتن ۽ ٻارن سميت ڪيترائي گم ٿي ويا آهن. جن جي ڳولا جو ڪم جاري آهي. فوت ٿيندڙن ۾ تبليغي جماعت جا 11 ماڻهو به شامل آهن. چئن جو تعلق لاهور، 5 جو فيصل آبا د۽ هڪ جو شيخو پوره سان آهي. هن چيو ته ٻن گهرن تي وڄ ڪري آهي ۽ ٻه مسجدون به ٻوڏ جي وڪڙ ۾ اچي ويون جتي ماڻهو ڦاٿل آهن. خوبصورت هنڌ هجڻ سبب ليسوا ۾ سياحن جي وڏي تعداد به موجود آهي ۽ فوتگين ۾ اضافي جو خدشو آهي. انتظاميه مظفرآباد ۾ ايمرجنسي ڪنٽرول روم قائم ڪري ڇڏيو آهي جنهن جو نمبر 058-21921643 آهي. ٻئي طرف ڪامسر ڊونگاڪس جي هنڌ تي مسافر جيپ نيلم درياءَ ۾ ڪري پئي جنهن جي نتيجي ۾ پنج ڄڻا فوت ٿي ويا آهن. جيپ ۾ هڪ ٻار سميت 6 ڄڻا سوار هئا. مقامي پوليس موجب حادثي ۾ هڪ شخص سخت زخمي ٿي پيو آهي جنهن کي طبي امداد جي لاءِ اسپتال منتقل ڪيو ويو آهي.
