لاهور(ويب ڊيسڪ)پاڪستان ڪرڪيٽ بورڊ نيوزيلينڊ خلاف هوم ٽي ٽوئنٽي سيريز ۾ به نوجوان ڪرڪيٽرن کي موقعو ڏيڻ واري فيصلي تي نظرثاني ڪندو.ذريعن جو چوڻ آهي ته افغانستان وانگر نيوزيلينڊ خلاف هوم ٽي ٽوئنٽي سيريز ۾ نوجوان رانديگرن کي موقعو ڏيڻ جو فيصلو ڪيو ويو هو پر هاڻ افغانستان هٿان سيريز ۾ شڪست کانپوءِ ان پلان تي ٻيهر غور جو امڪان آهي.سينيئر رانديگرن کي نيوزيلينڊ خلاف ٽي 20 سيريز لاءِ آرام ڏنو ويندو ۽ ون ڊي سيريز ۾ شامل ٿيڻ جو امڪان هو.پاڪستان ڪرڪيٽ بورڊ ۾ اها به راءِ آهي ته جيئن ته نيوزيلينڊ جي ٽيم به نوجوان رانديگرن تي مشتمل آهي، پلان موجب پاڪستان کي به نوجوان رانديگرن کي کيڏڻ گهرجي، هوم ڪنڊيشنز ۾ پاڪستان جي نوجوان ڪرڪيٽرن کي اعتماد ملندو ۽ هو پرفارم ڪندا. پلان موجب نوجوان رانديگرن کي موقعو ڏيڻ يا نه ڏيڻ بابت فيصلو هلندڙ هفتي ٿيڻ جو امڪان آهي.پاڪستان ۽ نيوزيلينڊ جي ٽيمن وچ ۾ 5 ٽي ٽوئنٽي ميچن جي سيريز کيڏي ويندي، جيڪا 14 اپريل کان لاهور ۾ شروع ٿيندي، جڏهن ته ٽي 20 ميچن کانپوءِ 5 ون ڊي ميچون کيڏيون وينديون.
