ڪراچي (اسٽاف رپورٽر) سنڌ هاءِ ڪورٽ وڪيلن طرفان پنهنجي ئي اصيلن (ڪلائنٽس) ۽ ٻين شهرين خلاف ڪيس داخل ڪرڻ تي ڳڻتيءَ جو اظهار ڪيو آهي. سنڌ هاءِ ڪورٽ ۾ وڪيلن طرفان پنهنجي اصيلن ۽ شهرين خلاف داخل ڪيسن جي معاملي تي ٻڌڻي ٿي. آءِ جي سنڌ جي رپورٽ ۾ ٻڌايو ويو ته سنڌ ۾ وڪيلن جي فرياد تي 609 ڪيس داخل ڪرايا ويا. جسٽس صلاح الدين پنهور جي سربراهي ۾ ٻه رڪني بئنچ ٻڌڻي کانپوءِ لکت حڪم نامو جاري ڪري ڇڏيو. عدالت وڪيلن طرفان شهرين خلاف ڪيس داخل ڪرڻ تي ڳڻتي جو اظهار ڪيو ۽ سڀني ڪيسن جي ڇنڊ ڇاڻ لاءِ معاملو سنڌ بار ڪائونسل کي موڪلي ڇڏيو. عدالت بار ڪائونسل کي وڪيلن طرفان ڪيس داخل ڪرائڻ جا سبب ڄاڻڻ لاءِ جاچ جي به هدايت ڪئي. عدالت چيو ته وڪيلن طرفان پنهنجي ئي اصيلن ۽ شهرين خلاف ڪيسن جو معاملو وڪيلن جي پيشي لاءِ ڳڻتيءَ جوڳو آهي. حڪم نامي ۾ سنڌ هاءِ ڪورٽ جعلي ڪيس داخل ڪرائيندڙ وڪيلن خلاف قانوني ڪارروائي جو حڪم به ڏنو. عدالت هدايت ڪئي ته پوليس پيشي، رنگ، مذهب، نسل ۽ ذات جي فرق بنا شهرين جي حقن جو تحفظ يقيني بڻائي، پوليس هر شهرين جي سيڪيورٽي بنا فرق جي يقيني بڻائي.
