مانچسٽر(ويب ڊيسڪ) انگلينڊ ٻئي ٽي ٽوئنٽي ۾ 5 وڪيٽن تان پاڪستان کي شڪست ڏئي ڇڏي. پهرين ميچ برسات سبب ڊرا ٿي هئي 3 ميچن جي سيريز جي آخري ميچ باقي آهي. انگلينڊ 3 ميچز جي ٽيسٽ سيريز ۾ اڳ ۾ ئي ڪاميابي حاصل ڪري چڪو آهي. ٻئي ٽي ٽوئنٽي ميچ ۾ پاڪستان جي بيٽنگ بهتر رهي پر بالنگ ڪمزور نظر آئي. ڪپتان مورگن جارحاڻي اننگ کيڏي 20 هين اوور جي پهرين بال تي ميچ کٽي ورتي. هو 33 بالن تي 66 رنز ٺاهي حارث رئوف جي بال تي ڪيچ ٿيو، هن 6 چوڪن 4 ڇڪا هنيا. ون ڊائون ڊيوڊ ملن به 6 چوڪن ۽ هڪ ڇڪي جي مدد سان 36 بالن تي 54 رنز ٺاهي ناٽ آئوٽ رهيو. اوپنر جوني بيئر اسٽوو 24 بالن تي 4 چوڪن ۽ ٻن ڇڪن جي مدد سان 44 رنز ٺاهي نمايان رهيو. ان کان اڳ پاڪستان بيٽنگ ڪندي 20 اوورز ۾ 4 وڪيٽن جي نقصان تي 195 رنز اسڪور ڪيون. بابر اعظم 7 چوڪن جي مدد سان 44 بالن تي 65 رنز ٺاهيون، فخر الزمان 5 چوڪن ۽ هڪ ڇڪي جي مدد سان 22 بالن تي 36 رنز ٺاهيون، محمد حفيظ 5 چوڪن 4 ڇڪن جي مدد سان 36 بالن تي 69 رنز ٺاهي نمايان رهيو.
