پيرس( ڊيسڪ نيوز) ڀارتي وزيراعظم نريدرا مودي آمريڪي صدر ڊونلڊ ٽرمپ سان ملاقات ۾ ٽياڪڙي واري سندس آڇ رد ڪري ڇڏي آهي ۽ چيو آهي ته پاڪستان سان سڀ معاملا ٻطرفي نوعيت جا آهن ان ڪري ڪنهن ٽئين ملڪ کي ان ۾ نه پوڻ گهرجي. 1947 کان اڳ اسين هڪ هئاسين ۽ پنهنجا مسئلا گڏجي پاڻ حل ڪري سگهون ٿا. فرانس ۾ جي سيون ملڪن جي سمٽ جي سائيد لائن تي ٿيل ملاقات بابت ڀارتي خابرو ايجنسي اي اين آءِ دعويٰ ڪئي آهي ته صدر ٽرمپ ڪشمير جي صورتحال بابت ساڻس ڳالهايو ۽ مودي کيس جواب ڏنو ته ڪشمير ۾ حالتون ڪنٽرول هيٺ آهن. صدر ٽرمپ صحافين سان ڳا لهائيندي ٻڌايو ته ڪشمير بابت وزيراعظم مودي سان گذريل رات به سندس ڳالهه بولهه ٿي هئي ۽ هي پاڪستان سان به ڳلهائيندا ۽ مونکي پڪ آهي ته ڪا شئي بهتر ٿيندي. هوڏانهن عمران خان غلام اسحاق خان انسٽيٽيوٽ ۾ نئين بلاڪ جي افتتاح وقت چيو آهي ته هو پنهنجو پاڻ کي ڪشمير جو سفير قرار ٿو ڏئي ۽ والاريل ڪشمير جي آزادي تائين دنيا جي هر فورم تي آواز اٿاريندو رهندو. هوڏانهن برطانوي پارليمان جي ميمبر عمران حسين اسلام آباد ۾ قومي اسمبلي جي اسپيڪر اسد قيصر سان ملاقات بعد پاڪستاني موقف جي تائيد ڪندي چيو ته ڀارتي اپاءَ هڪ طرفا آهن جيڪي اقوام متحده جي سلامتي ڪائونسل جي ٺهرائن، ڀارت جي پنهنجي آئين ۽ جنيوا ڪنويشن جي نفي آهن. هن چيو ته سلامتي ڪائونسل کي ڪردار ادا ڪرڻ گهرجي ۽ اسان کي ڪشميرين کي نسل ڪشي کان بچائڻو پوندو. واضح رهي ته وزيراعظم عمران خان اڄ قوم کي خطاب ڪندو، ٽرمپ مودي ملاقات جي تناظر ۽ حڪومت پاران ڪشمير بابت ورتل اپائن جي باري ۾ قوم کي آگاهه ڪندو.
