لاهور (اسپورٽس نيوز) نوجوان قومي ڪرڪيٽر صائم ايوب جو چوڻ آهي ته هو پاڻ کي جديد دور جي ڪرڪيٽ لاءِ تيار ڪري رهيو آهي، کيس جڏهن به قومي ٽيم ۾ موقعو ملندو آهي ته ان ئي ذهنيت سان کيڏندو آهيان.گذريل ڏينهن قائداعظم ٽرافي جي فائنل ۾ ڪراچي وائيٽس فيصل آباد ريجن کي 456 رنسن تان شڪست ڏئي ٽرافي پنهنجي نالي ڪري ورتي، صائم ايوب کي پهرين اننگز ۾ ڊبل سينچري ۽ ٻي اننگز ۾ هڪ سينچري سان مين آف دي فائنل قرار ڏنو ويو. جڏهن ته ڪراچي وائيٽس جي ڪپتان سرفراز احمد کي ٽورنامينٽ جو بهترين رانديگر قرار ڏنو ويو.ميڊيا سان ڳالهائيندي صائم ايوب چيو ته منهنجو خيال آهي ته هر ڪنهن جو ڌيان جديد دور جي ڪرڪيٽ تي آهي، پاڻ کي جديد دور جي ڪرڪيٽ لاءِ تيار ڪري رهيو آهيان، قومي ٽيم ۾ جڏهن به موقعو ملندو آهي ان ئي ذهنيت سان کيڏندو آهيان.قائد اعظم ٽرافي جي فتح بابت ڳالهائيندي صائم ايوب چيو ته ڪراچي وائيٽس کي کٽڻ جو هدف هو، مان خوش آهيان ته ان ۾ حصو ورتو، مون کي قائد اعظم ٽرافي دوران گهڻو ڪجهه سکڻ جو موقعو مليو. صائم ايوب پنهنجي تقرير جاري رکندي وڌيڪ چيو ته ڊريسنگ روم ۾ ٽيسٽ ڪرڪيٽر هئا، ماحول تمام سٺو هو، سينيئرز مان گهڻو ڪجهه سکيو.
