لاهور (ويب ڊيسڪ) پنجاب جي وزيراعليٰ مريم نواز چيو آهي ته پنجاب کي سڄي دنيا جي لاءِ واپار ۽ سرمائيڪاري جو مرڪز بنائينداسين. پنجاب جي وزيراعليٰ مريم نواز چين ۾ پنجاب بزنس ڪانفرنس کي خطاب ڪندي چيو ته چين جي دوري دوران چيني اختيارين بهترين ميزباني ڪئي، چين جي ترقي اسان لاءِ اهميت رکي ٿي. هن چيو ته صدر شي جن پنگ جي باصلاحيت قيادت کي خراج تحسين پيش ڪريان ٿي. چين جي اڳواڻن ۽ مختلف ڪمپنين کان ڪافي ڄاڻ حاصل ڪئي، چيني حڪومت جي سياسي ڏاهپ ۽ ترقي سڀني لاءِ مشعل راهه آهي.مريم نواز چيو ته موسمياتي تبديلين کي منهن ڏيڻ لاءِ چين جون پاليسيون اهم آهن ۽ چيني واپارين کي پنجاب ۾ سرمائيڪاري جي لاءِ سهولتون ڏينداسين، ڏوراهين علائقن جي ترقي لاءِ چين جي ماڊلن کي اپنايو ويندو. هن چيو ته پنجاب کي سڄي دنيا جي لاءِ واپار ۽ سرمائيڪاري جو مرڪز بنائينداسين. پاڪستان ۽ چين جا ڏهاڪن تي ٻڌل مضبوط ۽ ڀائراڻا لاڳاپا آهن. پنجاب بزنس ڪونسل ٻنهي ملڪن وچ ۾ اهم ڪردار ادا ڪندو.پنجاب جي وزيراعليٰ چيو ته مان چيني حڪومت جي مهمان نوازي تي تمام گهڻي ٿورائتي آهيان چين جي دوري ۾ ماحوليات جي بهتري لاءِ تريبيتي پروگرام بابت ڳالهيون ٿيون. جڏهن ته آءِ ٽي، زراعت، اي آءِ سميت مختلف شعبن ۾ سرمائيڪاري تي به ڳالهيون ڪيون ويون. پاڪستان جي سياحت، سماجي ۽ اقتصادي شعبن ۾ سرمائيڪاري جا تمام گهڻا موقعا موجود آهن.
