اسلام آباد (بيورو رپورٽ) منصوبه بندي واري کاتي جي وفاقي وزير احسن اقبال چيو آهي ته حڪومت کي پي آءِ اي جي نجڪاري ۾ ڪاميابي ناهي ملي، ڪنهن به قومي اداري کي ڀُڳڙن جي مٺ تي وڪرو ٿيڻ نه ڏينداسين.هن چيو ته ڀارت ۾ به ايئر انڊيا جي نيلامي 3 کان 4 ڀيرا ٿي، پي ٽي آءِ حڪومت جي ڪوڙي پروپيگنڊا سبب پي آءِ اي جي اها حالت ٿي آهي، يورپ ۽ برطانيه جا رستا کلندا ته پي آءِ اي جي حالت بهتر ٿي ويندي.هن چيو ته اڳوڻي هوا بازي واري وزير جي هڪ بيان سبب اسان کي اربين روپين جو نقصان برداشت ڪرڻو پيو. وفاقي وزير وزير چيو ته جيڪڏهن بجلي کي سستو ڪري عوام تائين پهچايو وڃي ته ان سان معيشت ۾ بهتري ايندي. سياري ۾ بجلي جي بلن ۾ عوام کي وڌ کان وڌ رليف ملندو.هن چيو ته نوازشريف جي نااهلي جو فيصلو هڪ سياسي فيصلو هو جنهن جي سزا عوام ۽ سمورو ملڪ ڀوڳي رهيو آهي. هڪ سوال جي جواب ۾ هن چيو ته عدليه جا جيڪي الائونسز وڌايا ويا آهن انهي جو جواب قانون وارو وزير ڏيندو. آئيني بينچ سپريم ڪورٽ جي ججز تي ٻڌل هوندو.
