ڪراچي(اسٽاف رپورٽر)سنڌ جي چيف سيڪريٽري آصف حيدر شاهه جي صدارت هيٺ ڪراچي جي چڙيا گهر بابت اعليٰ سطحي اجلاس ٿيو. اجلاس ۾ ڪمشنر ڪراچي، سيڪريٽري لوڪل گورنمينٽ، ميونسپل ڪمشنر، ڊائريڪٽر ريڪريئيشن ۽ ٻين لاڳاپيل آفيسر شرڪت ڪئي. اجلاس ۾ آگاهي ڏني وئي ته چڙيا گهر ۾ هن وقت مختلف قسمن جا لڳ ڀڳ 850 جانور ۽ پکي موجود آهن ۽ 2012 کان وٺي چڙيا گھر لاءِ ڪو به جانور خريد نه ڪيو ويو آهي. ان موقعي تي چيف سيڪريٽري آصف حيدر شاهه ڪراچي چڙيا گهر کي مستقبل ۾ غير ملڪي جانور خريد نه ڪرڻ جو حڪم ڏيندي چيو ته ڌارين جانورن کي نه رکڻ گهرجي، اهي هتان جي ماحول ۾ زندهه نٿا رهي سگهن.هن چيو ته جانورن کي ضروري جڳهه کاڌي ۽ ماحولياتي حالتن کان محروم ڪيو ويندو آهي ته ۽ اهي دٻاءُ، بيماري ۽ وقت کان اڳ موت جو شڪار ٿي ويندا آهن. چيف سيڪريٽري هدايت ڪئي ته چڙيا گھر ۾ سڀني جانورن کي عالمي معيار مطابق کاڌو ۽ صحت جون سهولتون فراهم ڪيون وڃن. هن خاطري ڪرائي ته سنڌ حڪومت چڙيا گھر ۾ جانورن جي خوراڪ ۽ صحت لاءِ ضروري فنڊ فراهم ڪندي. چيف سيڪريٽري جهنگلي جيوت کاتي ۽ ڪمشنر ڪراچي کي هدايتون ڏنيون ته جانورن ۽ پکين جي غير قانوني واپار ۾ ملوث ماڻهن خلاف ڪارروائي ڪئي وڃي.
