ڊاڪٽر ذاڪر نائڪ خلاف مني لانڊرنگ ڪيس ۾ چارج شيٽ پيش

نئين دهلي (م ڊ) ڀارت ۾ مالي ڏوهن جي جاچ واري اداري انفورسمينٽ ڊائريڪٽوريٽ اسلامي مبلغ ڊاڪٽر ذاڪر نائڪ تي مني لانڊرنگ جي ڪيس ۾ چارج شيٽ عدالت ۾ جمع ڪرائي ڇڏي آهي. مالي بي ضابطگين سان گڏوگڏ مٿس منافرت ڦهلائڻ جو به الزام آهي. ذاڪر نائڪ هن وقت جلاوطني واري زندگي گذاري رهيو آهي، جنهن لاءِ ٻڌايو ويو آهي ته سندس غيرقانوني اثاثا اٽڪل هڪ ارب 93 ڪروڙ ڀارتي روپئي برابر آهن. ذاڪر نائڪ اهڙن الزامن جي ترديد ڪندي چوندو رهيو آهي ته هن غيرقانوني طريقي سان دولت ناهي ڪمائي ۽ نه ئي ملڪيت ٺاهي آهي. ڀارتي اداري چنائي ۾ انٽرنيشنل اسڪول جي عمارت، 10 فليٽس، 3 گدام، ٻن عمارتن، پوني ۽ ممبئي ۾ زمين ۽ 10 بينڪ اڪائونٽس جي نشاندهي ڪئي آهي. ڀارت ۾ ڊاڪٽر ذاڪر نائڪ جي اسلامي تعليمات جي چئنل ”پيس“ تي پابندي لڳل آهي، پر ان هوندي به دنيا ۾ اٽڪل 20 ڪروڙ ماڻهو هي چئنل ڏسي رهيا آهن. پيس چئنل جي براڊ ڪاسٽنگ دبئي مان ٿيندي آهي. ڀارتي اداري الزام هنيو آهي ته ڊاڪٽر ذاڪر نائڪ جي اشتعال پکيڙيندڙ تقريرن ۽ ليڪچرز ڀارت ۾ مسلمانن کي پرتشدد ڪارروائين لاءِ اڪسائيندڙ آهن.