ڪراچي (اسٽاف رپورٽر)رمضان المبارڪ دوران ڪراچي ۾ ڌاڙن ۽ ڦرلٽ جي واقعن ۾ اضافو ٿيو، جنهن ۾ 3 مبينا ڌاڙيل مارجي ويا.ناظم آباد ميٽرڪ بورڊ آفيس ويجهو هڪ شهري جي فائرنگ ۾ ٻه مبينا ڦورو مارجي ويا. ايس ايس پي موجب، فائرنگ جو واقعو ڦر دوران پيش آيو، ۽ مارجي ويل شڪي ماڻهن وٽان هٿيار هٿ ڪيا ويا آهن. شفيق موڙ ويجهو هڪ گارڊ هٿان هڪ ڌاڙيل مارجي ويو، جڏهن ته ٻيو فرار ٿي ويو. پوليس موجب، ڌاڙيلن هڪ خاندان کي ڦريو هو، جيئن ئي ڌاڙيلن فرار ٿيڻ جي ڪوشش ڪئي ته ڪار ۾ موجود گارڊ فائرنگ ڪري ڏني.سپر هاءِ وي تي پوليس وردي پهريل ماڻهن پاران ڦرلٽ ۽ تشدد ڪرڻ کان پوءِ، هڪ شهري کان 250,000 رپيا ۽ هڪ موبائل فون ڦريو ويو.واقعي جو ڪيس داخل ڪيو ويو آهي، پر جوابدارن کي گرفتار نه ڪيو ويو آهي.
