ڪراچي(ويب ڊيسڪ)پاڪستان ۽ نيوزيلينڊ وچ ۾ ڪراچي ٽيسٽ جي ٽئين ڏينهن ڪپتاني جي معاملي تي دلچسپ صورتحال پيدا ٿي وئي، جنهن ۾ ٽن ڪپتانن هڪ ئي ڏينهن ٽيم جي ڪپتاني ڪئي.ڪراچي ٽيسٽ جي ٽئين ڏينهن ڪپتان بابر اعظم بيمار ٿي پيو ۽ وائرل فلو سبب ميدان ۾ نه آيو، جڏهن ته سندس جاءِ تي نائب ڪپتان محمد رضوان کي ڪپتاني جون ذميواريون سنڀالڻيون هيون پر رضوان پليئنگ اليون جو حصو نه هو. رضوان فيلڊنگ لاءِ آيو ۽ ڪپتاني جي شروعات ڪئي جنهن تي تڪرار پيدا ٿيو جڏهن ته قومي ٽيم انتظاميا ان حوالي سان پي سي بي جي ضابطن کان بي خبر هئي. ميچ ريفري ۽ فيلڊ امپائر پاڪستاني ٽيم انتظاميا کي ٻڌايو ته آءِ سي سي جي ضابطن موجب متبادل رانديگر ڪپتاني نٿو ڪري سگهي. جنهن بعد سرفراز ڪپتاني ڪئي. جڏهن ته سرفراز ڪپتاني واري معاملي تي امپائر جي فيصلي خلاف رويو ورتو جيڪو درست ثابت نه ٿيو. سرفراز جي ڪپتاني به گهڻي دير برقرار نه رکي سگهي ۽ ڪپتان بابر اعظم طبيعت ۾ بهتري محسوس ڪندي 81 هين اوور ۾ ميدان ۾ پهتو ۽ ڪپتاني جون ذميواريون سنڀاليون. ڪراچي ٽيسٽ جي ٽئين ڏينهن جي راند جاري آهي نيوزيلينڊ 3 وڪيٽن جي نقصان تي منجهند 2 وڳي تائين 327 رنز ٺاهي ورتيون هيون. پاڪستان پهرين اننگ ۾ بابر ۽ سلمان آغا جي سينچرين ۽ سرفرا جي ففٽي سبب 438 رنز ٺاهيون هيون.
