ڪراچي (ويب ڊيسڪ )وڪيٽ ڪيپر بيٽسمين 36 ورهين جو ذوالقرنين حيدر اڄڪلهه پيٽ جي سنگين بيماري سبب بستري تي آهي.آپريشن کان پوءِ ڪرڪيٽر ڪمزور ٿي ويا آهن ۽ هلڻ جي قابل به نه آهن، جڏهن ته وڌيڪ علاج لاءِ رقم نه هجڻ سبب پريشاني پيدا ٿي وئي آهي. ذوالقرنين پراميد آهي ته سندس طبي خرچ پي سي بي برداشت ڪندو، جڏهن ته سندس گهروارن مطالبو ڪيو آهي ته ذوالقرنين کي ڪنهن به راند ۾ مستقل نوڪري ڏني وڃي. ذوالقرنين حيدر نومبر 2010ع ۾ متحده عرب امارات ۾ پاڪستاني ڪرڪيٽ ٽيم کي ڇڏي انگلينڊ هليو ويو، جنهن کانپوءِ سندس ڪيريئر تڪرارن جو شڪار ٿي ويو، هن ڊوميسٽڪ ڪرڪيٽ کيڏي پر پاڪستاني ٽيم جا دروازا بند ٿي ويا. ڊپارٽمينٽن جي بندش سان هو ڊوميسٽڪ ڪرڪيٽ کان پري ٿي ويو ۽ ٻاهرين ليگز ۾ کيڏڻ لڳو. ٻه هفتا اڳ هو عمان ۾ ليگ کيڏي رهيو هو جڏهن هن کي معدي جي خطرناڪ بيماري ٿي وئي، پرڏيهه ۾ علاج جو خرچ وڌيڪ هئڻ سبب هو سخت تڪليف ۾ وطن واپس آيو ۽ لاهور جي مقامي اسپتال ۾ سندس آپريشن ٿيو.
