لاهور (ڊيسڪ نيوز) پاڪستان جي مشهور اداڪاره صبا قمر افواهن جي سختيءَ سان ترديد ڪندي چيو آهي ته ”ڀارتي جاسوس ڪلڀوشن جي زندگيءَ تي ٺهندڙ ڪنهن به فلم ۾ حصو نه پئي وٺان“. ياد رهي ته ڪجهه ڏينهن اڳ اهي افواهه اٿيا هئا ته ڀارتي جاسوس ڪلڀوشن جي زندگيءَ تي فلم ٺاهي پئي وڃي جنهن ۾ صبا قمر اهم ڪردار ادا ڪندي. اهڙي افواهه جي زور وٺڻ بعد صبا قمر سماجي رابطن واري سائيٽ ”ٽوئٽر“ وسيلي ترديدي ٽوئيٽ پڌري ڪئي. انهيءَ ٽوئيٽ ۾ صبا قمر چيو آهي ته ”مونکي گهڻي کِل ايندي آهي جو مونکي اهڙين فلمن ۾ شامل ڪيو ويندو آهي جن جي نالن جي به مونکي خبر ناهي هوندي ۽ ايمانداريءَ جي ڳالهه ته اها آهي جو مان ڪا فلم سائن ڪندي آهيان ته ان جو اعلان پاڻ ئي ڪندي آهيان“.
