راولپنڊي (ويب ڊيسڪ) ڪور ڪمانڊرز ڪانفرنس هر قيمت تي بنا ڪنهن فرق جي دهشتگردي کي ختم ڪرڻ جي عزم کي ورجائيندي واضح ڪيو آهي ته پاڪستان کي غير مستحڪم ڪرڻ جي ڪوشش ڪندڙ ملڪ دشمن ڌرين، سهولتڪارن ۽ سندن حوصلا افزائي ڪندڙن کي رياست پوري طاقت سان منهن ڏيندي، ڪنهن کي به بلوچستان ۾ امن ۾ رخنو وجهڻ جي اجازت نه ڏني ويندي. آءِ ايس پي آر موجب آرمي چيف جنرل سيد عاصم منير جي صدارت هيٺ 268 هين ڪور ڪمانڊرز ڪانفرنس منعقد ٿي. فورم شهيدن جي روحن کي ثواب پهچائڻ لاءِ فاتحه خواني ڪئي. ڪانفرنس ۾ شرڪت ڪندڙن مادر وطن جي امن ۽ استحڪام لاءِ پاڪ فوج جي شهيدن، قانون لاڳو ڪندڙ ادارن ۽ شهرين جي لازوال قربانين کي خراج عقيدت پيش ڪيو. فورم کي خطي جي موجوده صورتحال، قومي سلامتي کي درپيش چئلينجز ۽ وڌندڙ خطرن جي جواب ۾ پاڪستان جي حڪمت عملي جي باري ۾ جامع بريفنگ ڏني وئي. ڪانفرنس ۾ علائقائي ۽ اندروني سلامتي جي صورتحال جو تفصيلي جائزو ورتو ويو. ڪانفرنس ۾ شرڪت ڪندڙن چيو ته بلوچستان جي استحڪام ۽ خوشحالي ۾ رخنو وجهندڙ ناپاڪ سياسي مفادن ۽ سماجي ڌرين کي بلوچستان جي عوام جي پختي حمايت سان فيصلائتي نموني ناڪام بڻايو ويندو. بلوچستان ۾ سمورين ڏيهي توڙي پرڏيهي ڌرين جو اصل چهرو، ڳٺ جوڙ ۽ ڏڦيڙ پکيڙڻ جون سموريون ڪوششون پوري طرح وائکيون ٿي چڪيون آهن. فورم ورجايو ته اهڙين ڌرين ۽ اهڙيون ڪوششون ڪندڙن کي ڪنهن به قسم جي معافي نه ڏني ويندي. فورم نيشنل ايڪشن پلان جي دائري ڪار تحت ”عزم استحڪام“ جي حڪمت عملي جي تيز ۽ اثرائتي عمل جي ضرورت تي پڻ زور ڀريو. فورم دهشتگردي خلاف پوري قوم جي تعاون سان گڏيل نقطه نظر جي اهميت کي به اجاگر ڪيو. ڪانفرنس ۾ شرڪت ڪندڙن ورجايو ته رياستي ادارا آئين جي دائري ۾ رهندي قانون تي پوري سگهه سان عمل ڪندا. قانون جي عملداري ۾ ڪنهن به قسم جي نرمي ۽ ڪوتاهي نه ڪئي ويندي.آرمي چيف سڄي پاڪستان ۾ نيشنل ايڪشن پلان تحت قائم ٿيل ضلعي رابطا ڪميٽين جي شروعات کي به ساراهيو. آرمي چيف بنا ڪنهن رڪاوٽ جي نيشنل ايڪشن پلان کي تيزي سان لاڳو ڪرڻ جي ضرورت تي زور ڀريندي چيو ته نيشنل ايڪشن پلان تي عمل ۾ حڪومتي هدايتن موجب سمورا ادارا پائيدار هم آهنگي، جامع ڪوششن ۽ سهڪار کي يقيني بڻائين . هن چيو ته پاڪ فوج حڪومت ۽ قانون لاڳو ڪندڙ ادارن کي دهشتگردن جي مالي مدد خلاف سخت قانوني قدمن ۾ مڪمل تعاون فراهم ڪندي، غير قانوني سرگرميون دهشتگردي جي مالي مدد سان اندروني طور جڙيل آهن. پاڪستان ۾ دهشتگردن ۽ سندن سهولتڪارن لاءِ ڪا به جاءِ ناهي. فورم ڀارت جي غير قانوني قبضي هيٺ آيل والاريل ڄمون ڪشمير ۾ انساني حقن جي سنگين ڀڃڪڙين تي سخت ڳڻتي جو اظهار ڪيو. فورم لائين آف ڪنٽرول تي ڀارتي فوج طرفان جنگ بندي جي بنا جواز ڀڃڪڙين تي به خدشا ظاهر ڪيا. فورم ڀارت جي غير قانوني قبضي هيٺ آيل والاريل ڄمون ڪشمير جي عوام کي منصفاڻن حقن جي فراهمي لاءِ پاڪستان جي پرزور ۽ پختي حمايت تي زور ڀريو. فورم عالمي سطح تي والاريل ڄمون ڪشمير ۾ جاري انساني حقن جي خلاف ورزين کي اجاگر ڪرڻ لاءِ مستقل سفارتي ڪوششن جي ضرورت تي پڻ زور ڀريو. فورم فلسطين جي عوام سان مڪمل يڪجهتي جو اظهار ڪندي غزه ۾ ٿيل انساني حقن جي سنگين ڀڃڪڙين ۽ جنگي ڏوهن جي سخت مذمت ڪئي. فورم فلسطين جي عوام جي پختي سفارتي، سياسي ۽ اخلاقي حمايت فراهم ڪرڻ جي عزم کي به ورجايو. ڪانفرنس جي پڄاڻي تي آرمي چيف فيلڊ ڪمانڊرز کي آپريشنل تياري ۽ پيشيوراڻي مهارت جي اعليٰ ترين معيارن کي برقرار رکڻ جي هدايت ڪئي. آرمي چيف بهترين جنگي تيارين کي برقرار رکڻ لاءِ سخت تربيت کي يقيني بڻائڻ تي پڻ زور ڀريو.
