اسلام آباد: (بيورو رپورٽ) وزيراعظم شهباز شريف، گهرو وزير محسن نقوي، پ پ چيئرمين بلاول ڀٽو زرداري سميت ٻين اڳواڻن ڪوئٽه ۾ ريلوي اسٽيشن تي ڌماڪي جي سخت لفظن ۾ مذمت ڪئي آهي.وزيراعظم شهباز شريف ڪوئٽه ريلوي اسٽيشن ڀرسان ڌماڪي جي مذمت ڪندي زخمين کي ترجيحي بنيادن تي طبي امداد ڏيڻ جي هدايت ڪئي آهي، وزيراعظم بلوچستان حڪومت کان واقعي جي جاچ رپورٽ طلب ڪري ورتي آهي. وزيراعظم پنهنجي بيان ۾ چيو ته معصوم ۽ هٿين خالي شهرين جي جان، مال کي نقصان پهچائيندڙ دهشتگردن کي سخت قيمت ادا ڪرڻي پوندي، دهشتگردي جي خاتمي لاءِ حڪومت ۽ سيڪيورٽي فورسز مڪمل طور تي سرگرم عمل آهي.بلاول ڀٽو زرداري ڌماڪي جي مذمت ڪندي چيو ته دهشتگردانه ڌماڪي ۾ پنهنجن پيارن کي وڃائيندڙ خاندانن جي ڏک ۾ برابر جو شريڪ آهيان. ڌماڪي جي زخمين جي بهتر علاج کي يقيني بنايو وڃي، معصوم شهرين کي نشانو بنائيندڙ انسان چورائڻ جي لائق نه آهي، انهن کي ڪنهن به قسم جي رعايت نه ملڻ گهرجي.بلاول ڀٽو زرداري چيو ته دهشتگردي ۽ انتهاپسندي جي خاتمي واري جنگ بابت پيپلز پارٽي جو موقف قوم جي آواز آهي، دهشتگردن ۽ انهن جي سهولتڪارن کي جڙ کان ختم ڪرڻ وارن قدمن جي حمايت ڪريون ٿا.گهرو وزير محسن نقوي ڪوئٽه ريلوي اسٽيشن ڀرسان ڌماڪي جي سخت لفظن ۾ مذمت ڪندي قيمتي انساني جانين جي نقصان تي گهري ڏک ۽ افسوس جو اظهار ڪيو. هن فوت ٿي ويلن جي وارثن سان دلي همدردي ۽ تعزيت جو اظهار ڪندي چيو ته معصوم شهرين کي نشانو بنجندڙ دهشتگرد ڪنهن به رعايت جا مستحق نه آهن. سموريون همدرديون فوت ٿي ويلن جي وارثن سان گڏ آهن. هن ڌماڪي جي جيتري به مذمت ڪئي وڃي گهٽ آهي. محسن نقوي چيو ته پاڪستان جو دشمن عدم استحڪام پيدا ڪرڻ جي لاءِ اها بزدلانه ڪارروائي ڪري رهيو آهي. قوم گڏجي هن سازش کي ناڪام بنائيندو.جماعت اسلامي جي امير حافظ نعيم الرحمان به ڪوئٽه ڌماڪي جي مذمت ڪندي چيو آهي ته ريلوي اسٽيشن تي بم ڌماڪي ۾ هينئر تائين 25 انساني جانيون ضايع ٿيڻ جا اطلاع آهن، بلوچستان ۾ دهشتگردي جا واقعا برداشت ڪرڻ جوڳا نه آهن. پنجاب جي وزيراعليٰ مريم نوازشريف به ڪوئٽه ڌماڪي جي مذمت ڪئي آهي، وزيراعليٰ ڌماڪي ۾ قيمتي انساني جانين جي نقصان تي ڏک جو اظهار ڪندي سوڳوار خاندان سان همدردي ۽ تعزيت جو اظهار ڪيو. جي يو آءِ سربراهه مولانا فضل الرحمان به ڌماڪي جي مذمت ڪندي چيو آهي ته ڪوئٽه ۾ ٿيندڙ بم ڌماڪو افسوسناڪ ۽ مذمت جوڳو آهي. ڪيترن ئي ماڻهن جي شهادت ۽ زخمي ٿيڻ جي خبرن کان پوءِ دل ڏکويل آهي. جي يو آءِ ڪارڪن اسپتال پهچي تعاون ڪن.
