لاهور (ويب ڊيسڪ) انگلينڊ جي دوري تي ويل پاڪستاني ڪرڪٽ ٽيم جي ڪپتان بابر اعظم چيو آهي ته سرفراز کان وڌيڪ اهميت محمد رضوان کي ڏينداسين ڇو ته هو آسٽريليا ۽ پاڪستان ۾ سٺي ڪارڪردگي ڏيکاري چڪو آهي. پاڪستان ڪرڪٽ بورڊ جي تعاون سان منعقد ڪيل آن لائن ڳالهه ٻولهه دوران هو لنڊن مان صحافين جا جواب ڏئي رهيو هو. هن چيو ته سندس ڀيٽ ويرات ڪوهلي سان نه ڪئي وڃي. هن کي خوشي ٿيندي جيڪڏهن سندس ڀيٽ پاڪستاني ليجنڊ جاويد ميانداد، انضمام الحق، يونس خان ۽ محمد يوسف سان ڪئي وڃي. هن چيو ته انگلينڊ جو بالنگ اٽيڪ بهتر ۽ تجربيڪار آهي هنن کي هوم گرائونڊ ۽ ڪرائوڊ جو به فائدو آهي بهرحال اسين بهتر ڪارڪردگي جو مظاهرو ڪنداسين. هن چيو ته پاڪستاني بالر عباس، نسيم شاهه ۽ شاهين شاه آفريدي به فارم آهن. هڪ سوال تي هن چيو ته مان بالر کي ڏسي نه پر بال کي ڏسي ان کي ميرٽ تي کيڏنو آهيان.
